ભુજ: જમ્મુ-કાશ્મીરના પહેલગાંવ ખાતે પોઇન્ટ ઝીરો બ્લેન્કથી ગોળીઓ ધરબી દઈ નિર્દોષ પર્યટકોને મોતને ઘાટ ઉતારી દેનારા પાકિસ્તાન પ્રેરિત ત્રાસવાદીઓના આતંકી હુમલાનો જવાબ આપવા ભારતીય સૈન્ય દ્વારા શરૂ કરવામાં આવેલા ઓપરેશન સિંદૂર બાદ હાલ સુરક્ષા એજન્સીઓ સતર્ક બની છે. બીજી બાજુ આવતીકાલે કેન્દ્રીય સંરક્ષણ પ્રધાન રાજનાથ સિંહ બે દિવસીય કચ્છની મુલાકાતે આવનારા છે તેવામાં પૂર્વ કચ્છના અંજાર તાલુકાના વરસામેડી ખાતે આવેલા કંડલા એરપોર્ટને બૉમ્બથી ઉડાવી દેવાનો ધમકીભર્યો ઇ-મેલ મળતાં હરકતમાં આવી ગયેલી સુરક્ષા એજન્સીઓને ભારે દોડધામ થઇ પડી હતી. ધમકીભર્યો ઈ-મેઈલ મળ્યા બાદ કંડલા એરપોર્ટને ચારે તરફથી કોર્ડન કરી લઈને હાથ ધરેલી સઘન તપાસ બાદ કાંઇ ન નીકળતાં સૌએ હાશકારો અનુભવ્યો હતો.
પ્રાપ્ત માહિતી મુજબ, વરસામેડી સ્થિત કંડલા એરપોર્ટ ઉપર રાબેતા મુજબ ગતિવિધિઓ ચાલી રહી હતી એ દરમ્યાન એરપોર્ટના ઇ-મેલ એડ્રેસ ઉપર એક અજ્ઞાત શખ્સનો મેલ આવ્યો હતો, જેમાં નમસ્કાર, એરપોર્ટની આસપાસ મૂકવામાં આવેલા બેકપેકમાં શક્તિશાળી વિસ્ફોટક ઉપકરણો છૂપાયેલા છે. તમારે તાત્કાલિક ઇમારતો ખાલી કરવી પડશે. તમારે ઉતાવળ કરવી પડશે, નહીંતર મોટી જાનહાની થશે એ પ્રકારનું લખાણ હતું.
આ પણ વાંચો: કચ્છના કંડલા એરપોર્ટને આરડીએક્સ જેવા વિસ્ફોટકોથી ઉડાવી દેવાના ઈ-મેઈલથી દોડધામ
આ ઇ-મેલ વાંચીને એરપોર્ટના ટર્મિનલ મેનેજર અંશુમન તિવારીએ ત્વરિત જાણકારી આપતાં ધસી ગયેલી પોલીસે બૉમ્બ ડીસ્પોસેબલ સ્ક્વોડ, ગંધ પારખું શ્વાન વગેરેને સાથે રાખીને સમગ્ર એરપોર્ટના ખૂણેખૂણાની સઘન તપાસ હાથ ધરી હતી, પરંતુ તપાસ દરમ્યાન કાંઇ ન નીકળતાં સૌએ રાહતનો દમ લીધો હતો. બધાને દોડતા કરી દેનારા ધમકીભર્યા ઇ-મેલ કરનારા અજાણ્યા ઇ-મેલધારક વિરુદ્ધ એરપોર્ટના ઇન્ચાર્જ ડાયરેક્ટર ભગવંતસિંઘ હુકમસિંઘે પોલીસ મથકે ફરિયાદ નોંધાવી હતી.
અત્રે ઉલ્લેખનીય છે કે, અત્યંત મહત્વના કંડલા એરપોર્ટને વિસ્ફોટકોથી ઉડાવી દેવાની ધમકીભર્યા ઇ-મેલ અગાઉ બેથી વધારે વખત આવી ચૂક્યા જેમાં હજુ સુધી કોઈ કડી મળી નથી. નાપાક પાકિસ્તાનને અડકીને અવેલા કચ્છ જેવા સુરક્ષાની દ્રષ્ટિએ અત્યંત સંવેદનશીલ જિલ્લામાં આ પ્રકારની ગતિવિધિઓ વારંવાર થવી એ બાબત અત્યંત ગંભીર હોવાનું સુરક્ષાના જાણકારો જણાવી રહ્યા છે.
