ભુજઃ દિવાળીના તહેવારો નજીક આવી ચુક્યા છે ત્યારે ભુજ સહીત કચ્છના શહેરી વિસ્તારોમાં હોમ ડેકોરની કલાત્મક ચીજવસ્તુઓ વહેંચતા ફેરિયાઓ ઠેર-ઠેર ગોઠવાયા છે. આ ફેરિયાઓ મૂળ તો બિહારના છે પરંતુ છેલ્લા લગભગ બે દાયકાઓથી કચ્છ ઉપરાંત રાજ્યના અન્ય જિલ્લાઓમાં સ્થાયી થયા છે અને જ્યાં જ્યાં તેઓ સ્થાયી થયા છે તે ગામોની ભૂમિને આવા પરિવારોએ તેમની કર્મભૂમિ બનાવી છે.
ઘરને સજવવા મામલે લોકોનો ટેસ્ટ બદલાયો છે, તેથી તેમની કલાત્મક ચીજવસ્તુઓ ખરીદતા નથી અને છેલ્લા પંદર વર્ષોમાં કદી પણ ન અનુભવી હોય તેવી ઘેરી મંદીનો સામનો આ શ્રમજીવી પરિવારો કરી રહ્યા છે. છેક બિહારથી ભુજ સ્થાયી થયેલા બીજય શાહ નામના ફેરિયાના જણાવ્યા પ્રમાણે વેસ્ટ પ્લાસ્ટિક અને અન્ય રી-સાઇકલ્ડ થયેલી જણસોમાંથી બનાવાયેલી હોમ ડેકોરની ચીજવસ્તુઓ જેવી કે પ્લાસ્ટિકના ફૂલ,મૂર્તિઓ, ચિનાઈ માટીની કલાકૃતિઓ, દુકાનોમાંથી લોકો ખરીદે છે પણ ખાસ કરીને ગુજરાત, રાજસ્થાન, ઉત્તર પ્રદેશ અને બિહારના કલાકારો દ્વારા બનાવાયેલા કલાત્મક નમૂનાઓ ફેંકી દેવાના ભાવે વેંચાતા હોવા છતાં કોઈ ખરીદનાર નથી!.
દિવાળી પૂર્વે લગબગ બે મહિના પૂર્વે અમે હોમ ડેકોરની કલાત્મક ચીજવસ્તુઓના ઢગલે ઢગલા રસ્તા પર ખડક્યા છે પણ એમાંના મોટાભાગની ચીજવસ્તુઓ લગભગ એક દાયકાથી વણ વેંચાયેલી પડી રહેવા પામી છે જેને લઈને અમારા પરિવારની દિવાળી તો બગડી જવા પામી છે. હોમ ડેકોરની કલાત્મક ચીજવસ્તુઓ પ્રત્યે ઘટતી જતી રુચિ પાછળ મોંઘવારીને જવાબદાર ગણતા આ ભાંગી ગયેલા રોડ સાઈડ ફેરિયાએ જણાવ્યું હતું કે, લોકો ભરપેટ બે ટંક ભોજન માટે ફાંફા મારી રહ્યા હોય ત્યારે ઘર સજાવટની ચીજવસ્તુઓ લોકો ક્યાંથી ખરીદે.આ માત્ર જાણે અમીરોનો જ શોખ હોય તેવી પરિસ્થિતિ ઉભી થવા પામી છે.
હવે હોમ ડેકોરની ચીજવસ્તુઓ રોડ સાઈડ વહેંચવાને બદલે અમે ફળ-ઝાડના રોપા,પક્ષી ઘર, પાણીના કુંડા જેવી ચીજ વસ્તુઓ વહેંચશું જેથી તેના વહેંચણ થકી અમારા ઘરના રસોડાના ચૂલા સળગે.
વસ્તુઓ મોંઘી હોવાનો સ્થાનિકોનો મત
આ વસ્તુઓ ખૂબ મોંઘી હોવાનુ્ં અમુક લોકોનું કહેવાનું છે. તેમના મત અનુસાર વસ્તુઓ સારી અને ટકાઉ હોય છે, પરંતુ દરેકને વારંવાર ઘરમાં નવી વસ્તુઓ લાવવાનો શોખ હોય છે, આથી તેઓ મોંઘી વસ્તુઓ લેવાને બદલે સસ્તી વસ્તુઓ લે છે. ઓનલાઈન ઘણી વસ્તુઓ સસ્તી મળે છે અને વેરાયટી પણ મળે છે. આથી આ વસ્તુઓ થોડી સસ્તી થાય તો ગ્રાહકો પણ મળી રહે.
એક તરફ આપણે સ્વદેશી વસ્તુઓની વાતો કરીએ છીએ, પરંતુ આપણી આસપાસના લોકોને સપોર્ટ કરતા નથી. આ સાથે લોકો ઓનલાઈન ઘણું મંગાવી લેતા હોવાથી રસ્તા પરના ફેરિયા અને દુકાનદારોને દિવાળીના તહેવારોમાં પણ હવે રોનક દેખાતી નથી.
આ પણ વાંચો…દિવાળીમાં ક્રેડિટકાર્ડ પર મળતી ઓફર્સથી અંજાશો નહીં, ડિસ્કાઉન્ટના નામે છેતરાતા પહેલા આ વાંચો
