ભુજઃ આ વર્ષે ચોમાસાં દરમ્યાન થયેલા સોળ આની વરસાદ બાદ સર્વત્ર છવાયેલી લીલોતરી વચ્ચે આગવી વનજીવ સંપદા ધરાવતા સીમાવર્તી કચ્છમાં સર્પદંશના બનાવોમાં ચિંતાજનક રીતે ઉછાળો આવ્યો છે.
વીતેલા માત્ર છ માસમાં જ કચ્છમાં ઝેરી-બિન ઝેરી સાપના દંશનો ભોગ બનેલા ૧૩૯ જેટલા લોકોની ભુજ સ્થિત જી.કે. જનરલ હોસ્પિટલમાં સફળ સારવાર આપવામાં આવી હોવાનું જાણવા મળ્યું હતું.
આપણ વાચો: ભુજમાં જાણીતા સ્નેક રેસ્ક્યૂઅરને જ સાપે ડંખ માર્યોઃ સારવાર મળતા જીવ બચ્યો
આ અંગે અદાણી સંચાલિત જી.કે જનરલ હોસ્પિટલના ઇમર્જન્સી અને મેડિસિન વિભાગના નિષ્ણાત તબીબોના જણાવ્યા મુજબ, સર્પદંશ બાદ સમયસર હોસ્પિટલમાં પહોંચનારા દર્દીઓ તાત્કાલિક સાજા થઈ ગયા હતા. વિલંબથી આવનારનાં લક્ષણો ગંભીર જણાયાં હતાં. ભોગ બનનારને જો સમયસર સારવાર ન મળે તો જીવ જોખમમાં પણ આવી શકે છે.
સાપ કરડે તો દંશની જગ્યાએ સોજો, દુ:ખાવો, કરડેલો ભાગ કાળો થઈ જવો, પાંપણ ઢળી પડવી, ધૂંધળું દેખાવું, શ્વાસમાં તકલીફ, પેશાબ લાલ આવવો, દાંત અને પેઢામાંથી લોહી પડવું, ચક્કર અને ઊંઘ આવવી વિગેરે લક્ષણો દેખાય છે.
અમુક કિસ્સામાં કિડની ઉપર પણ સાપના ઝેરની અસર થાય છે. સર્પ કરડે અને હોસ્પિટલ પહોંચાય ત્યાં સુધીમાં દર્દીને ગભરાટ ન થાય તે રીતે શાંત પાડવો, કરડેલી જગ્યાને સાબૂ અને પાણીથી ધોઈ નાખવી, તુરંત નજીકની હોસ્પિટલમાં પહોંચવું, લક્ષણ ન હોય તો પણ ૨૪ કલાક તબીબના અવલોકનમાં દર્દીને રાખવામાં આવે એ જરૂરી છે.
આપણ વાચો: અમદાવાદમાં સર્પદંશની સંખ્યામાં વધારો, આ વર્ષે નોંધાયા અધધ કેસ
સાપ કરડયો હોય ત્યાં ચીરો કે કટ લગાવવો નહીં અને દોરો કે કપડું કસીને બાંધવું નહીં, ફિલ્મોમાં બતાવવામાં આવે છે તેમ ઝેરને ચૂસવું નહીં જેવી સાવચેતી રાખવા પણ નિષ્ણાત તબીબોએ જણાવ્યું હતું.
આગોતરી સાવચેતી બાબતે તબીબોના જણાવ્યા મુજબ, ખેતર કે બગીચામાં લાંબા બૂટ અને લાંબી પેન્ટ પહેરવી, રાત્રે ટોર્ચ ચાલુ રાખીને ચાલવું, આસપાસના ઝાડી-ઝાંખરાં, કચરો, પથ્થરો નિવાસ સ્થાનથી શક્ય હોય તો દૂર રાખવા, મચ્છરદાનીમાં સૂવું, ખોરાક ખુલ્લો રાખવો નહીં, સાપ દેખાય તો સલામત અંતરેથી તેનો ફોટો લેવો પણ જરૂરી છે કારણ કે, સર્પની ઓળખ બાદ ઝેરની માત્રા કેવી છે, તેની સારવાર માટે તબીબોને મદદરૂપ બને છે. સાપથી ડરવાને બદલે તેનું સરંક્ષણ કરવું જોઈએ તેમ તેમણે ઉમેર્યું હતું.
