ભુજઃ ‘સેકન્ડ સમર’ તરીકે ઓળખાતા ભાદરવા મહિનાનો પ્રારંભ થઇ ચુક્યો છે એ વચ્ચે રણપ્રદેશ કચ્છ સહીત રાજ્યના કેટલાક વિસ્તારોમાં સમયાંતરે વરસી રહેલા વરસાદે વિરામ લેતાં ભાદરવી તાપે આક્રમણ શરૂ કરી દેતાં જનજીવન પ્રભાવિત થઇ રહ્યું છે.
કચ્છના મોટાભાગના મથકોમાં મહત્તમ તાપમાનનો આંક ૩૪થી ૩૭ ડિગ્રી વચ્ચે પહોંચી ગયો છે અને આજે ૩૫ ડિગ્રી સે. મહત્તમ તાપમાન સાથે ભુજ શહેરે રાજ્યના સૌથી ગરમ મથકોમાં પોતાનું સ્થાન જાળવી રાખ્યું છે. કંડલા(એરપોર્ટ) ખાતે પણ ઉષ્ણતામાનનો પારો ૩૪ ડિગ્રીએ પહોંચતાં અંજાર-ગાંધીધામ વિસ્તાર પણ અકળવનારા બફારામાં શેકાયા હતા.
આ ઉપરાંત અબડાસા તાલુકાના મુખ્યમથક નલિયામાં ૩૨ ડિગ્રી મહત્તમ તાપમાન રહેતાં અહીં ગરમીમાં આંશિક રાહત અનુભવવા મળી હતી. લઘુતમ પારો પણ ઊંચકાઈને ૨૪થી ૨૭ ડિગ્રી વચ્ચે પહોંચી જતાં સૂર્યાસ્ત બાદ ઉકળાટથી જનજીવન હાલ અકળાઈ રહ્યું છે.
ગણેશ ચતુર્થીનો તહેવાર સંપન્ન થયો અને અને નવરાત્રીનું કાઉન્ટડાઉન શરૂ થઇ ચૂક્યું છે તેવામાં અચાનક ગરમીનો પ્રકોપ વધી જતાં બપોરના સમયે પ્રણાલીગત બજારોમાં સન્નાટો પ્રસરેલો જોવા મળી રહ્યો છે. સાંજના પાંચ વાગ્યા બાદ લોકો ખરીદી માટે બજારોમાં જવાનું પસંદ કરી રહ્યા છે.
આ પણ વાંચો…શ્રાવણ મહિનામાં પરસેવાથી રેબઝેબ થયા કચ્છવાસીઓઃ અંગ દઝાડે તેવી ગરમી
