અમદાવાદઃ ગુજરાતમાં હાલ દિવાળીના તહેવારની રોનક જામી રહી છે. આ દરમિયાન રાજ્યમાં દક્ષિણ ગુજરાતમાં ફરી વરસાદ વરસ્યો હતો. સ્ટેટ ઈમરજન્સી ઓપરેશન સેન્ટરના આંકડા પ્રમાણે, ડાંગમાં 0.94 ઇંચ, વાંસદામાં 0.83 ઇંચ, ધરમપુરમાં 0.20 ઇંચ, કપરાડામાં 0.12 ઇંચ અને પારડીમાં 0.04 ઇંચ વરસાદ પડ્યો હતો. રાજ્યમાં દિવસ અને રાતનું તાપમાન સામાન્યથી નીચે નોંધાયું હતું, જેના કારણે સવાર-સાંજ ઠંડકનો અનુભવ થઈ રહ્યો છે.
હવામાન વિભાગની આગાહી મુજબ, આગામી 7 દિવસ દરમિયાન રાજ્યના મહત્તમ તાપમાનમાં કોઈ મોટો ફેરફાર થવાની સંભાવના નથી. જોકે, લઘુત્તમ તાપમાનમાં 2 થી 3 ડિગ્રીનો વધારો થવાની સંભાવના છે. રાજ્યમાં દિવાળી અને નવા વર્ષના તહેવારના દિવસો દરમિયાન ગીર સોમનાથ, દીવ. દક્ષિણ ગુજરાતના ડાંગ, નવસારી, વલસાડ તેમજ દમણ, દાદરા અને નગર હવેલીમાં હલવાથી મધ્યમ વરસાદની આગાહી કરવામાં આવી હતી.
આ પણ વાંચો: તહેવારોમાં ‘માવઠા’ની આગાહી: દિવાળીની રોનક વચ્ચે દક્ષિણ ગુજરાત-સૌરાષ્ટ્રમાં વરસાદ!
ગુજરાતમાં આ વર્ષે સરેરાશ 118.12 ટકા વરસાદ વરસ્યો છે. કચ્છ ઝોનમાં સૌથી વધુ 148.14 ટકા વરસાદ વરસ્યો છે. જ્યારે ઉત્તર ગુજરાતમાં 121.51 ટકા, મધ્ય ગુજરાતમાં 117.09 ટકા સરેરાશ વરસાદ ખાબક્યો છે. સૌરાષ્ટ્રમાં 108.60 ટકા અને દક્ષિણ ગુજરાતમાં ચોમાસાની સિઝનનો સરેરાશ 123.26 ટકા વરસાદ પડ્યો છે. ગુજરાતમાં 16 તાલુકામાં 10થી 20 ઇંચ, 137 તાલુકામાં 20થી 40 ઇંચ, 98 તાલુકામાં 40 ઇંચથી વધુ વરસાદ નોંધાયો છે.
રાજ્યની જીવાદોરી સમાન નર્મદા ડેમ 98.20 ટકા ભરાયેલો છે. રાજ્યના અન્ય 206 જળાશયોમાં 96.68 ટકા જળસંગ્રહ છે. રાજ્યમાં 156 ડેમ હાઇ એલર્ટ અને 125 ડેમ સો ટકા ભરાયેલા છે. રાજ્યમાં સિઝનનો 100 ટકાથી વધુ વરસાદ વરસ્યો હોવા છતાં સાત ડેમમાં 25 ટકાથી ઓછો જળસંગ્રહ છે, જ્યારે નવ ડેમ 25 થી 50 ટકા વચ્ચે ભરાયેલા છે.
