ગુજરાતમાં ટાઉનશીપ પ્રોજેક્ટ્સને મળશે વેગ: 16 વર્ષ બાદ નવી ડ્રાફ્ટ પોલિસી આવશે…
અમદાવાદ: રાજ્ય સરકાર શહેરોમાં સંગઠિત, સસ્તું આવાસને પ્રોત્સાહન આપવા માટે નવી ટાઉનશીપ નીતિનો મુસદ્દો તૈયાર કરી રહી છે. અગાઉની 2009ની નીતિ વિવિધ કારણોસર સફળ થઈ શકી ન હતી. નવી પોલિસી ફ્લોર સ્પેસ ઇન્ડેક્સ (એફએસઆઈ)માં છૂટછાટ, ટેક્સ બ્રેક્સ અને શહેરી વિકાસ યોજનાઓ સાથે વધુ સુસંગત છે. 2009ની રેસિડેન્શિયલ ટાઉનશીપ નીતિ રજૂ કર્યાના સોળ વર્ષ પછી, રાજ્ય મોટા પાયે, આત્મનિર્ભર ટાઉનશીપ બનાવવા માટે રિયલ એસ્ટેટ ડેવલપર્સને આકર્ષક પ્રોત્સાહનો આપવાનું આયોજન થઈ રહ્યું છે.
સૂત્રોના જણાવ્યા પ્રમાણે, નવી નીતિ અગાઉની નીતિની સફળતામાં અવરોધરૂપ બનેલી ઘણી ખામીઓને દૂર કરે તેવી અપેક્ષા છે. 2009ની નીતિ હેઠળ બહુ ઓછા પ્રોજેક્ટ્સ શરૂ થયા હતા. તે સમયે ડેવલપર્સને પાણી, રસ્તા અને સ્વચ્છતા જેવી આવશ્યક સેવાઓ પર સ્થાનિક સંકલનમાં મુશ્કેલી પડી હતી. સરકારને વિવિધ રિયલ એસ્ટેટ ડેવલપમેન્ટ સંસ્થાઓ તરફથી નવી ટાઉનશીપ નીતિની જરૂરિયાત માટે રજૂઆતો મળી હતી. જે અંતર્ગત નવી ટાઉશિપ પોલિસીમાં આવી મુશ્કેલીઓ દૂર કરવામાં આવશે.
સત્તાવાર સૂત્રોએ જણાવ્યું હતું કે ટાઉનશીપમાં જાહેર ઇન્ફ્રાસ્ટ્રક્ચરનો મોટા ભાગનો ખર્ચ ડેવલપર્સ ઉઠાવતા હોવાથી, સરકાર સૂચિત ટાઉનશીપમાં જમીન કપાત (રસ્તાઓ, જાહેર જગ્યાઓ વગેરે જેવી સુવિધાઓ માટે શહેરી સત્તાવાળાઓ દ્વારા સંપાદિત જમીન)માં રાહત આપવાનું લક્ષ્ય ધરાવે છે. સૂત્રોએ જણાવ્યું હતું કે સરકાર સૂચિત ટાઉનશીપ નીતિમાં એફએસઆઈ અને મ્યુનિસિપલ અને અન્ય કર, સ્ટેમ્પ ડ્યુટી અને નોંધણી ફીમાં અન્ય છૂટછાટો આપવાનો પ્રસ્તાવ પણ વિચારી રહી છે.
સૂત્રોએ જણાવ્યું હતું કે, અમે રાષ્ટ્રીય અને આંતરરાષ્ટ્રીય સ્તરે ટોચના ટાઉનશીપ પ્રોજેક્ટ્સને આપવામાં આવતી વિવિધ જોગવાઈઓ અને પ્રોત્સાહનોનો અભ્યાસ કરી રહ્યા છીએ અને સૂચિત નીતિમાં આ પ્રોત્સાહનો સામેલ હશે. અમે ટૂંક સમયમાં વિવિધ હિતધારકો પાસેથી સૂચનો મેળવવા માટે વ્યાપક જાહેર પરામર્શ કરીશું. સૂત્રોએ જણાવ્યું હતું કે સરકાર આવા પ્રોજેક્ટ્સ માટે ડેવલપર્સને જમીન ઓફર કરવાના વિકલ્પ પર પણ વિચાર કરી શકે છે, કારણ કે મોટા ટાઉનશીપ પ્રોજેક્ટ્સ માટે જમીનની ઉપલબ્ધતા મુશ્કેલ બની શકે છે.
