અમદાવાદઃ રાજ્યમાં હવામાન વિભાગ દ્વારા આગામી સાત દિવસ હળવાથી મધ્યમ વરસાદની આગાહી કરવામાં આવી હતી. 48 કલાકમાં ભારેથી અતિભારે વરસાદની તેમજ ઉત્તર ગુજરાતમાં અતિભારે વરસાદની આગાહી કરવામાં આવી હતી. સૌરાષ્ટ્રમાં 24 કલાકમાં ભારે વરસાદની આગાહી કરી હતી. વીજળીના કડાકા ભડાકા સાથે વરસાદની આગાહી કરવામાં આવી હતી. ઉપરાંત માછીમારોને 24 કલાક દરિયો નહીં ખેડવા સૂચના આપવામાં આવી હતી.
70 તાલુકામાં એક ઈંચથી ઓછો વરસાદ
રાજ્યમાં છેલ્લા 12 કલાકમાં 83 તાલુકામાં વરસાદ વરસ્યો હતો. સુરતના ઉમરપાડામાં સૌથી વધુ 2.24 ઈંચ વરસાદ પડ્યો હતો. વલસાડના કપરાડામાં 2.20 ઈંચ, સાબરકાંઠાના ખેડબ્રહ્મામાં પણ 2.20 ઈંચ વરસાદ પડ્યો હતો. વ્યારામાં 1.65 ઈંચ, સાગબારામાં 1.54 ઈંચ, નડીયાદમાં 1.50 ઈંચ વરસાદ પડ્યો હતો. રાજ્યમાં ત્રણ તાલુકામાં બે ઈંચથી વધારે, 10 તાલુકામાં એક ઈંચથી વધારે અને 70 તાલુકામાં એક ઈંચથી ઓછો વરસાદ પડ્યો હતો.
રાજ્યમાં ચોમાસાની શરૂઆતથી જ સારો વરસાદ વરસ્યો છે. અત્યાર સુધીમાં સરેરાશ 49.96 ટકા વરસાદ વરસી ચુક્યો છે. કચ્છ ઝોનમાં સૌથી વધુ 58.44 ટકા, દક્ષિણ ગુજરાતમાં 53.63 ટકા, સૌરાષ્ટ્રમાં 49.19 ટકા, પૂર્વ મધ્યમાં 48.03 ટકા, ઉત્તર ગુજરાતમાં 45.92 ટકા વરસાદ વરસ્યો છે. સરદાર સરોવર ડેમ 51.26 ટકા ભરાયેલો છે, જ્યારે રાજ્યના અન્ય 206 જળાશયો તેની કુલ સંગ્રહ ક્ષમતાના 58.69 ટકા ભરાયેલા છે.
રાજ્યમાં સાર્વત્રિક વરસાદના કારણે 26 ડેમ 100 ટકા ભરાયેલા છે, જ્યારે 44 ડેમ 70 થી 100 ટકા, 43 ડેમ 50 થી 70 ટકા, 42 ડેમ 25 થી 50 ટકા અને 40 ડેમ 25 ટકાથી ઓછા ભરાયેલા છે. હાલ રાજ્યમાં 41 ડેમ હાઈ એલર્ટ પર છે. જ્યારે 22 ડેમ એલર્ટ તથા 18 ડેમ વોર્નિંગ પર છે.
