ગુજરાત હાઇકોર્ટે આ કેસમાં ડીજીપી સહિત પોલીસ અધિકારીઓને ફટકારી નોટિસ, જાણો શું છે ઘટના?

અમદાવાદ: ગુજરાત હાઇકોર્ટે રાજ્યના ડીજીપી, આણંદ જિલ્લાના પોલીસ વડા અને અન્ય પોલીસ અધિકારીઓને નોટિસ પાઠવી છે. એક નાણાકીય છેતરપિંડીના કેસમાં પોલીસે કરેલી ગેરવર્તણૂંકના આક્ષેપને પગલે આ કાર્યવાહી કરવામાં આવી છે. પોલીસ અધિકારીઓએ આરોપી પાસેથી 1 કરોડ રૂપિયા અને 100 તોલા સોનું જપ્ત કર્યું હતું, પરંતુ તેમણે આ વસ્તુઓ સરકારમાં જમા કરાવી નહોતી.

આણંદના અરજદાર રોહિણી પટેલ અને લતા મકવાણાએ તેમના વકીલ યતિન સોની મારફત પોલીસ પર પોતાનો બચાવ કરવાનો અને આરોપીઓ સામે FIR દાખલ ન કરવાનો આરોપ લગાવ્યો છે.

“એક કા તીન” નામની નાણાકીય છેતરપિંડીની યોજનાના ભોગ બનેલા લોકો દ્વારા ન્યાય માટે દાયકાઓ સુધી ચાલેલી લડતમાંથી આ આરોપો ઉદ્ભવ્યા છે. હાઈકોર્ટે 5 ફેબ્રુઆરીએ આગળની સુનાવણી નિર્ધારિત કરી છે.

અરજીકર્તાએ વર્ષ 2014માં આ યોજનામાં રોકાણ કર્યું હતું. તેમણે આ કેસમાં મીના પટેલ, સુરેશ પટેલ અને ધવલ પટેલ નામના વ્યક્તિઓ સામે ફરિયાદ દાખલ કરી હતી. બંને અરજીકર્તાઓને અનુક્રમે રૂ. 40 લાખ અને રૂ. 12 લાખનું નુકસાન થયું હતું. પોલીસે 3 ડિસેમ્બર 2014ના રોજ કાર્યવાહીમાં અરજીકર્તાના પડોશીઓ પ્રશાંત સોનવણે અને મનોજ કોરીની જુબાનીને આધારે મુંબઈમાં આરોપીઓ પાસેથી રોકડ અને સોનું કબજે કર્યું હોવાના અહેવાલ છે. જો કે, આ વસૂલાતનો કથિત ચાર્જશીટમાં સમાવેશ કરવામાં આવ્યો ન હતો.

પ્રાંરભિક તપાસમાં કોઇ મદદ ન મળતા અરજદારો તેમનો કેસ ડીજીપી પાસે લઇ ગયા હતા. તેમણે આણંદમાં લોકલ ક્રાઈમ બ્રાન્ચ (એલસીબી)ને આ કેસની તપાસ સોંપી હતી. જો કે LCBએ વર્ષ 2021માં દાખલ કરેલા ક્લોઝર રિપોર્ટમાં પણ ક્યાંય એ વિગતો નહોતી. પોલીસ અધિકારીઓને બચાવવા માટે સંપૂર્ણ સત્યનું આલેખન જ ન થયું. અરજદારો મુંબઇ સ્થિત સાક્ષીઓને મળ્યા હતા. જેમણે તેમના ખાતા પોલીસ રેકોર્ડ વચ્ચેની વિસંગતતાઓની પુષ્ટિ કરી. ત્યાં સુધી અપૂરતા પુરાવાને કારણે કેસ બંધ કરી દેવામાં આવ્યો હતો.

આખરે વર્ષ 2022માં અરજદારો હાઇકોર્ટમાં પહોંચ્યા હતા અને કોર્ટે પોલીસ અધિકારીઓ સામે તપાસનો આદેશ આપ્યો હતો.