ગુજરાતમાં રૂ. 800 કરોડના નકલી GST બિલિંગ કૌભાંડનો પર્દાફાશઃ 4 આરોપી ઝડપાયાં

અમદાવાદ: આ વર્ષની સૌથી મોટી કાર્યવાહીમાં લગભગ ₹ 800 કરોડના મોટા પાયે બનાવટી GST કૌભાંડનો ડિરેક્ટોરેટ જનરલ ઓફ GST ઇન્ટેલિજન્સ (DGGI)ના અમદાવાદ ઝોનલ યુનિટે પર્દાફાશ કર્યો છે અને ત્રણ અલગ-અલગ કેસમાં ચાર શખસની ધરપકડ કરી હતી.

આ તપાસ અમદાવાદ, રાજકોટ, ભાવનગર, જૂનાગઢ, જામનગર, મુંબઈ અને ચંદ્રપુર સહિતના વિવિધ શહેરોમાં હાથ ધરવામાં આવી હતી. તપાસમાં જાણવા મળ્યું છે કે એક નેટવર્ક માલની વાસ્તવિક હેરફેર વિના જ નકલી ઇન્પુટ ટેક્સ ક્રેડિટ જનરેટ કરી હતી.

આ પણ વાંચો : ગુજરાતમાં ₹ 560 કરોડનું બોગસ બિલિંગ કૌભાંડ ઝડપાયું: જામનગરના સીએ પર ₹ 112 કરોડની કરચોરીનો આરોપ…

ત્રણ કેસમાં સૌથી મોટા કેસ, જે ₹ 550 કરોડના નકલી બિલિંગ સાથે સંકળાયેલો છે, DGGI એ 27 નવેમ્બરના અમદાવાદમાંથી બદ્રે આલમ પઠાણ અને તૌફિક ખાનની ધરપકડ કરી હતી. તૌફિક ખાન, જે એ એચ એન્જિનિયરિંગ વર્ક્સના પ્રોપરાઇટર છે, તેણે કથિત રીતે ₹ 45 કરોડના નકલી બિલ મેળવ્યા હતા અને ₹ 8.86 કરોડની નકલી ITC (Input Tax Credit) મેળવી હતી.

અધિકારીઓના જણાવ્યા અનુસાર આ બંને આરોપીઓએ ફરાર આરોપી ઇકરામ ખાન સહિત અન્ય લોકો સાથે મળીને નકલી દસ્તાવેજોનો ઉપયોગ કરીને અનેક પેઢીઓ ઊભી કરી હતી, ડમી ડિરેક્ટરોની નિમણૂક કરી હતી અને કાયદેસર વ્યવસાયિક પ્રવૃત્તિ જેવો દેખાવ કરવા માટે સમગ્ર નેટવર્કનું સંચાલન ઓનલાઈન કર્યું હતું.

આ પણ વાંચો : Gujarat GST: ગુજરાતમાં બોગસ GST બિલિંગ માફિયા બેકાબુ, આટલા કરોડની કરચોરી કરી

આ કૌભાંડમાં નકલી ઇન્વોઇસ મુખ્યત્વે અમદાવાદ, જામનગર, રાજકોટ અને મહારાષ્ટ્રમાં લોખંડ અને સ્ટીલ ઉત્પાદન એકમોને આપવામાં આવ્યા હતા, જે હવે સંભવિત કરચોરી અને ગુપ્ત ક્લિયરન્સ માટે તપાસ હેઠળ છે. DGGIએ નિષ્ક્રિય પેઢીઓના માલિકોને તેમની GST નોંધણી મધ્યસ્થીઓને ન સોંપવા અને જો કામગીરી બંધ કરી દીધી હોય તો તેને નિ:શુલ્ક સરન્ડર કરવા અપીલ કરી છે.

અન્ય એક કેસમાં, જૂનાગઢના હાર્દિક રાવલ, જેણે 47 બનાવટી પેઢીઓનું નેટવર્ક ચલાવ્યું હતું, તેની 25 નવેમ્બરના ધરપકડ કરવામાં આવી હતી. તેણે માલની પ્રાપ્તિ વિના ₹110.57 કરોડના બોગસ બિલ પર ₹28.02 કરોડની ખોટા ITC મેળવી હતી.

આ પણ વાંચો : જામનગરમાં GSTનું મેગા ઓપરેશન: એકસાથે 25 પેઢીઓ પર દરોડા, રૂ. 100 કરોડથી વધુના કૌભાંડની આશંકા

જામનગરના પિત્તળ અને સ્ટીલ વેપાર સાથે જોડાયેલા ત્રીજા કેસમાં, પટેલ મેટલ ક્રાફ્ટ એલએલપીના ભાગીદાર જયદીપ વિરાણીની 28 નવેમ્બરના ધરપકડ કરવામાં આવી હતી. તેણે 40થી વધુ અસ્તિત્વમાં ન હોય તેવી પેઢીઓ દ્વારા જારી કરાયેલા ₹121 કરોડના નકલી ઇન્વોઇસના આધારે ₹22 કરોડની અમાન્ય ITC મેળવી હોવાનું જણાયું છે.