ગુજરાત એટીએસે આણંદમાંથી ઝડપ્યો પાકિસ્તાની જાસૂસ
(અમારા પ્રતિનિધિ તરફથી)
અમદાવાદ: ગુજરાત એટીએસે આણંદમાં રહેતા પાકિસ્તાનના જાસૂસને ઝડપી પાડ્યો હતો. આ જાસૂસ ભારતની મહત્ત્વની માહિતી પાકિસ્તાન મોકલતો હતો. ગુજરાત એન્ટી ટેરરિઝમ સ્ક્વૉડે મિલિટરી ઈન્ટેલિજન્સ દ્વારા આપવામાં આવેલા ચોક્કસ ઈનપુટના આધારે આણંદ જિલ્લાના તારાપુર ખાતેથી એક પાકિસ્તાની જાસૂસી એજન્ટ લાભશંકર મહેશ્ર્વરીની ધરપકડ કરી હતી.
પ્રાપ્ત માહિતી અનુસાર ગુજરાત એટીએસ ટીમે આરોપીની અટકાયત કરી પ્રારંભિક પૂછપરછ કરતા બહાર આવ્યું હતું કે, લાભશંકર મહેશ્ર્વરી મૂળ પાકિસ્તાની હિન્દુ છે જે ૧૯૯૯માં તેની પત્ની સાથે પ્રજનન સારવાર માટે ભારત આવ્યો હતો. શરૂઆતમાં તે તારાપુરમાં તેના સાસરિયાના ઘરે રહેતો હતો. તેણે લાંબા ગાળાના વિઝા એપ્લાય કરવાનું ચાલુ રાખ્યું અને તેના સાસરિયાઓના સમર્થનથી તારાપુરમાં કરિયાણાની દુકાન, અનેક ભાડે આપેલી દુકાનો, સ્ટોર અને પોતાનું એક ઘર સાથે એક સફળ વેપારી બન્યો હતો. આ દરમ્યાન આ દંપતીને કોઈ બાળક ન હતું. ત્યારબાદ તેમને ૨૦૦૬માં ભારતીય નાગરિકતા આપવામાં આવી હતી. માહિતી એવી પણ મળી છે કે ૨૦૨૨ની શરૂઆતમાં આરોપી પાકિસ્તાનમાં તેના માતા-પિતાની મુલાકાતે પણ ગયો હતો. આરોપીની વિઝા પ્રક્રિયા દરમિયાન અને તેના માતા-પિતાના ઘરે પાકિસ્તાનમાં રોકાણ દરમિયાન ત્યાં ખેતી પણ કરતો હતો. માનવામાં એવું પણ આવે છે કે તે પાકિસ્તાની ગુપ્તચર એજન્સી સાથે વાતચીત કરી રહ્યો છે. ત્યારે વૉટ્સએપ એકાઉન્ટની સુવિધા પણ લીધી હતી. આ ઉપરાંત તેણે સિમ કાર્ડ પાકિસ્તાનમાં મોકલ્યું હતું અને પાકિસ્તાની એજન્સી વતી અન્ય કેટલાક શંકાસ્પદ જાસૂસી વાહકોને નાણાં ટ્રાન્સફર કરવા સહિત પાક એજન્સીને અન્ય સહાય પૂરી પાડી હતી. જોકે, દેશભરમાં સ્વતંત્રતા દિવસ પહેલા હર ઘર તિરંગા નામની ઝુંબેશની આડમાં એપીકે ફાઇલો ઇન્સ્ટોલ કરવાની લાલચ આપીને તેમાં વૉટ્સએપ પ યુઝર, એપીએસ અધિકારી તરીકે દર્શાવીને એપ્લિકેશનને ટેક્સ્ટ મેસેજ સાથે આવા લક્ષ્યોને મોકલતા હતા અને તેમને એપ્લિકેશન ઇન્સ્ટોલ કરવા અને એપ્લિકેશન પર રાષ્ટ્રધ્વજ સાથે તેમના વોર્ડનો ફોટો અપલોડ કરવા માટે પ્રોત્સાહિત કરતા. બીજી તરફ આરોપી પાકિસ્તાની એજન્ટ લાભશંકર વોટ્સએપ નંબર પર ભારતીય નાગરિકોના મોબાઇલ સાથે ચેડા કરીને તેમાંથી માહિતી મેળવીને પાકિસ્તાન એજન્સીને પણ મોકલતો હતો. જેથી તેણે ભારતીય આઈટી અધિનિયમનું ઉલ્લંઘન કર્યાનું બહાર આવ્યું છે.
પાકિસ્તાની ગુપ્તચર એજન્સી સાથે આરોપીની સંડોવણીને લગતા તમામ પાસાનું ગુજરાત પોલીસ એટીએસ દ્વારા વિશ્ર્લેષણ કરવામાં આવી રહ્યું છે. બાદમાં ટૂંક સમયમાં સ્થાનિક કોર્ટમાં આરોપીને રજૂ કરી રિમાન્ડ માટે પોલીસ કસ્ટડી મેળવાશે.
