ગુજરાતમાં આવતીકાલે ભારે વરસાદની આગાહી: દક્ષિણ ગુજરાત અને સૌરાષ્ટ્રના અમુક જિલ્લાઓમાં એલર્ટ!

અમદાવાદ: હાલ ગુજરાતના અનેક જિલ્લામાં અનરાધાર વરસાદ પડી રહ્યો છે, ત્યારે હવામાન વિભાગ દ્વારા ગુજરાતના વિવિધ વિસ્તારોમાં આવતીકાલે ભારે વરસાદની આગાહી કરવામાં આવી છે. ગુજરાત રીજનના નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા નગર હવેલી માં છૂટાછવાયા સ્થળોએ ભારે વરસાદની સંભાવના છે. આ ઉપરાંત, સૌરાષ્ટ્રના અમરેલી, ભાવનગર, ગીર સોમનાથ અને દીવ માં પણ ભારે વરસાદ વરસી શકે છે.

ઉત્તર ગુજરાતના તમામ જિલ્લાઓ જેવા કે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહીસાગર માં છૂટાછવાયા સ્થળોએ ગાજવીજ સાથે, વીજળીના કડાકા-ભડાકા અને 30-40 કિલોમીટર પ્રતિ કલાકની ઝડપે સપાટી પવન ફૂંકાવાની શક્યતા છે, જેમાં હળવાથી મધ્યમ વરસાદ પણ આવી શકે છે.

દક્ષિણ ગુજરાત, સૌરાષ્ટ્ર-કચ્છ વરસાદની આગાહી
આ જ રીતે, દક્ષિણ ગુજરાતના તમામ જિલ્લાઓ વડોદરા, છોટાઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા નગર હવેલી માં પણ ગાજવીજ સાથે હળવાથી મધ્યમ વરસાદની સંભાવના છે. સૌરાષ્ટ્ર-કચ્છના તમામ જિલ્લાઓ સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવ માં પણ હળવા ગાજવીજ અને પવન સાથે હળવાથી મધ્યમ વરસાદ થવાની આગાહી કરવામાં આવી છે.

આ પણ વાંચો -‏‏‎ દક્ષિણ ગુજરાતના વાપીમાં 4 કલાકમાં 4 ઇંચ વરસાદઃ મધુબન ડેમમાંથી પાણી છોડાયું!

રાજ્યના 92 તાલુકામાં વરસાદ

આજે સમગ્ર રાજયમાં વરસાદી માહોલ રહ્યો હતો. સાંજે 6 વાગ્યા સુધીમાં રાજ્યના 92 તાલુકામાં વરસાદ પડ્યો હતો. આજે સૌથી વધુ વરસાદ વલસાડ જિલ્લામાં પડ્યો હતો. વલસાડ જિલ્લાના વાપીમાં 6.81 ઇંચથી વધુ વરસાદ પડ્યો છે. તે ઉપરાંત પારડીમાં 5.04 ઇંચ, ધરમપુરમાં 4.25 ઇંચ, કપરાડામાં 4.49 ઇંચ વરસાદ પડ્યો છે. આજે 28 તાલુકામા 1 ઇંચથી વધુ વરસાદ પડ્યો હતો.