સુરતઃ ગુજરાતની સૌથી આધુનિક માનવામાં આવતી સુરતની લાજપોર જેલ ફરી વિવાદમાં આવી હતી. દુષ્કર્મના કેસમાં આજીવન કેદની સજા કાપી રહેલા નારાયણ સાઈની બેરેકમાંથી મોબાઈલ ફોન, બેટરી અને સિમ કાર્ડ મળી આવતાં ખળભળાટ મચી ગયો હતો. જેલ તંત્રના સરપ્રાઇઝ ચેકિંગમાં આ ખુલાસો થયો હતો. જે બાદ સચિન પોલીસ સ્ટેશનમાં નારાયણ સાઈ સામે કેસ નોંધવામાં આવ્યો હતો.
કેવી રીતે ઝડપાયો મોબાઈલ
સૂત્રોના જણાવ્યા પ્રમાણે, 27 નવેમ્બરે જેલરને બેરક નંબર 1માં બંધ નારાયણ સાઈ પાસે મોબાઈલ ફોન હોવાની માહિતી મળી હતી. જેના આધારે જેલ સર્ચ સ્કવોર્ડે સર્ચ કર્યું હતું.જેમાં બેરકની પાછળના લોખંડના દરવાજા પાછળ મોબાઈલ ફોન ચુંબકથી ચોંટાડેલો જોવા મળ્યો હતો. ફોનમાંથી બેટરી અને સિમકાર્ડ પહેલાથી કાઢી લીધા હતા. તલાશી દરમિયાન નારાયણ સાઈની બેગમાંથી સિમ કાર્ડ મળી આવ્યું હતું. તેણે જણાવ્યું કે, ફોનનો ઉપયોગ કર્યા બાદ બેટરી અને સિમ અલગ કરી દેતો હતો. બેટરીને દરવાજા પાછળ છૂપાવવામાં આવતી હતી.
આ પણ વાંચો: નારાયણ સાંઈને મળ્યા જામીન, જોધપુર જેલમાં બંધ પિતા આસારામ સાથે 11 વર્ષ પછી થશે મુલાકાત
કેવી રીતે પહોંચ્યો ફોન
જેલ તંત્ર દ્વારા કાર્યવાહી કરીને સચિન પોલીસ સ્ટેશનમાં ફરિયાદ નોંધાવવામાં આવી હતી. પોલીસે નારાયણ સાઈ સામે ગુનો નોંધી તપાસ શરૂ કરી છે. પોલીસ હવે ફોન જેલમાં કેવી રીતે પહોંચ્યો, તેમાં કેટલા લોકોની મિલીભગત છે અને તેનો ઉપયોગ કયા હેતુથી થતો હતો તેની વિગતો મેળવી રહી છે.
11 મહિનામાં જેલમાંથી પકડાયા 12 મોબાઈલ
ઉલ્લેખનીય છે કે છેલ્લા 11 મહિનામાં લાજપોર જેલમાંથી 12થી વધુ મોબાઈલ ફોન મળી આવ્યા છે. વારંવાર બનતી આ પ્રકારની ઘટનાઓ સુરક્ષા વ્યવસ્થા અને કર્મચારીઓની સતર્કતા પર ગંભીર સવાલ ઉભા કરી રહી છે. હાઈ પ્રોફાઈલ કેદી નારાયણ સાઇ જેવા ગુનેગારો પાસેથી મોબાઇલ ફોન મળી આવવો જેલ તંત્ર માટે મોટો પડકાર બની ગયો છે.
જેલ સૂત્રોનું કહેવું છે કે, મોબાઇલ ફોન વારંવાર વિઝિટર્સ, કેટલાક કર્મચારીઓની મિલીભગતથી અંદર પહોંચી જાય છે. આ મામલે પણ તપાસ દરમિયાન અનેક ચોંકાવનારા ખુલાસા થવાની સંભાવના વ્યક્ત કરવામાં આવી રહી છે.
