સુરતમાં 9 મહિનામાં 1400થી વધુ બેંક ખાતા ખોલી ₹ 2600 કરોડની છેતરપિંડી

સુરતઃ ડાયમંડ સિટી સાયબર ફ્રોડનું હબ બન્યું હોય તેમ 9 મહિનામાં 13 ખાનગી અને 11 સરકારી બેંકોમાં 1405 ખાતા ખોલી 2600 કરોડથી વધુની છેતરપિંડી આચરવામાં આવી હતી. 2600 કરોડથી વધુનાં ટ્રાન્ઝેક્શન, જે 2007 બેંક ખાતાંમાં થયાં હતાં એમાંના 70 ટકા બેંક ખાતાં સુરતનાં હોવાનું સામે આવ્યું હતું. 1,405 એકાઉન્ટ સુરતનાં હતા. આ એકાઉન્ટ્સમાં વિદેશમાં બેસેલા સાયબર માફિયાઓ સુરતના લોકોની મદદ લઈ આ બેંક ખાતાંનો સાયબર ક્રાઈમ માટે ઉપયોગ કરતા હતા.

સુરતના જે બેંક એકાઉન્ટનો ઉપયોગ થયો હતો એમાં કેટલાક એકાઉન્ટ હોલ્ડરોએ તો કમિશન પર એકાઉન્ટ આપ્યાં હતાં, જ્યારે કેટલાક એકાઉન્ટ હોલ્ડરની જાણ બહાર જ તેમના નામે ખાતાં ખોલી સાયબર ક્રાઈમ માટે એનો ઉપયોગ કરાયો હોવાનું સામે આવ્યું હતું. ચાઇનીઝ ગેંગ દ્વારા દેશભરમાં સાયબર ફ્રોડની ઘટનાઓને અંજામ આપવામાં આવી રહ્યો છે, જેમાં સૌથી મહત્ત્વનો રોલ સુરતમાં ખોલવામાં આવી રહેલાં બેંક એકાઉન્ટનો છે.

આ પણ વાંચો: મહિલા સાથે છેતરપિંડી અને ધમકી આપવા પ્રકરણે દિલ્હીના યુટ્યૂબરની ધરપકડ

સુરતમાં પરપ્રાંતિયો મોટી સંખ્યામાં રોજગારી માટે આવતા હોય છે. તેમાંથી ઘણાને અક્ષર જ્ઞાન હોતું નથી. આવા લોકોને ટાર્ગેટ કરીને ટોળકી તેમને બેંકમાં ખાતું ખોલાવી આપવાની લાલચ આપતા હતા. આ જ કારણે સાયબર માફિયાઓ સુરતમાં સૌથી મોટી સંખ્યામાં બેંક એકાઉન્ટ અલગ-અલગ લોકોના નામે ખોલાવ્યા હતા. બેંક એકાઉન્ટ ખોલવાના નામે તેમને 5,000થી 10,000 રૂપિયા આપવામાં આવતા હતા. ઘણા કિસ્સાઓમાં તો લોકો પૈસાની લાલચમાં પણ બેંક એકાઉન્ટ ભાડેથી આપતા હોવાનું પોલીસ તપાસમાં સામે આવ્યું હતું.

સુરત પોલીસે અત્યાર સુધીમાં જેટલા પણ સાયબર ફ્રોડની ઘટનાઓમાં પર્દાફાશ કર્યા છે એમાં તમામનું આંતરરાષ્ટ્રીય કનેક્શન બહાર આવ્યું છે. ખાસ કરીને દુબઈ, ક્યુબા, થાઈલેન્ડ, સિંગાપોર, પાકિસ્તાન, મ્યાનમારનો સમાવેશ થાય છે. આ તમામ સાયબર ફ્રોડની ઘટનાઓ ચાઈનીઝ ગેંગ દ્વારા ચલાવવામાં આવે છે અને આ ફ્રોડને ચલાવવા માટે ભારત અને ખાસ કરીને સુરતના લોકોના બેંક એકાઉન્ટનો ઉપયોગ થઈ રહ્યો છે.