સુરતઃ શહેરમાં અકસ્માતની વધુ એક ઘટના બની હતી. મનપાની કચરાની ગાડીની અડફેટે 20 વર્ષની સ્ટેટ લેવલની રનરનું મોત થયું હતું. મનપાના કચરાના ટેમ્પો ચાલકે તેને ટક્કર મારતાં તેણી મોપેડ પરથી પટકાઇ હતી અને ગંભીર ઇજા થવાથી ઘટના સ્થળે જ મોત થયું હતું.
મળતી વિગત પ્રમાણે, 19 વર્ષીય વિધિ કદમ સ્ટેટ લેવલ રનર તરીકે ઓળખાતી હતી અને તે નિયમિત રીતે ફિટનેસ માટે જીમ જતી હતી. સવારે તે પનાસ વિસ્તારમાંથી પોતાના મોપેડ પર પસાર થઈ રહી હતી, તે દરમિયાન સુરત મનપાના કચરાના ટેમ્પો ચાલકે તેને બેફામ રીતે ટક્કર મારી હતી. ટક્કર એટલી જોરદાર હતી કે વિધિ કદમ મોપેડ પરથી નીચે પટકાઈ અને તેને ગંભીર ઈજાઓ થતા તેનું ઘટનાસ્થળે જ મોત નીપજ્યું હતું.
ઘટનાની જાણ થતાં જ ખટોદરા પોલીસ તાત્કાલિક ઘટનાસ્થળે પહોંચી હતી અને કાયદેસરની કાર્યવાહી હાથ ધરી હતી. પોલીસે કચરા ગાડીના ચાલકને ઝડપી પાડીને વધુ તપાસ હાથ ધરી હતી. આ દુર્ઘટનાના પગલે વિધિના પરિવારમાં અને સમગ્ર શહેરમાં શોકનું મોજું ફરી વળ્યું હતું. સ્ટેટ લેવલની પ્રતિભા ધરાવતી યુવતીનું આ રીતે કરુણ મોત થવાથી રમતગમત જગતમાં પણ ગમગીની છવાઈ ગઈ હતી.
સુરત મહા નગર પાલિકાની કચરાની ગાડીએ અકસ્માત સર્જ્યો તેના ડ્રાઇવર પાસે પાકું ડ્રાઇવિંગ લાઇસન્સ પણ નહતું. તે લર્નિંગ લાઇસન્સ પર જ મનપાનો ટેમ્પો ચલાવતો હતો. પોલીસે વધુ તપાસ હાથ ધરી હતી.
જીત્યો હતો મેડલ
મૃતક વિધિ કદમ ગુજરાતની એક એથ્લીટ હતી અને તે સ્ટેટ-લેવલ રનર છે.તેણે 66મી U-19 સ્કૂલ નેશનલ ગેમ્સમાં ભાગ લીધો હતો, જ્યાં તેણે અન્ય ત્રણ એથ્લીટ – કાજલ વાજા, કુમકુમ રામાણી અને સુમિતા માલવી – સાથે 4x100m રિલે ટીમમાં બ્રોન્ઝ મેડલ જીત્યો હતો.
આ પણ વાંચો…અમદાવાદમાં કચરાની ગાડીનો કહેરઃ 8 વાહનને કચડ્યાં, એકનું મોત
