સુરતઃ ડાયમંડ નગરી સુરતને લોજિસ્ટિક હબ બનાવવા પ્લાન તૈયાર કરવામાં આવ્યો છે. સુરત મ્યુનિસિપલ કોર્પોરેશન અને જીઆઈડીબીના પ્રયાસથી તૈયાર થયેલો રિપોર્ટ સરકારને મોકલવામાં આવ્યો હતો. આ પ્લાનનો મુખ્ય હેતુ સુરતને લોજિસ્ટિક હબ બનાવીને રોજગારીની નવી તકો ઉભી કરવાનો છે.
લોજિસ્ટિક હબ બનવાથી શું ફાયદો થશે?
શહેરને લોજિસ્ટિક હબ બનાવવાનો ઉદ્દેશ આ ઇન્ડસ્ટ્રી સાથે સંકળાયેલા લોકોની સ્કીલ ડેવલપ કરવાનો પણ છે. લોજિસ્ટિક પ્લાન હેઠળ, ભવિષ્યમાં તમામ કનેક્ટિવિટીને એક જ ડેશબોર્ડ પર લાવવામાં આવશે.
આ ડેશબોર્ડમાં વેરહાઉસિંગ, મલ્ટિમોડલ લોજિસ્ટિક પાર્ક્સ, ઇલેક્ટ્રિક ફ્રેઇટ કોરિડોર્સ, ડ્રાઇવર્સ માટેની સંકલિત સુવિધાઓ અને ટ્રાન્સપોર્ટેશન જેવી તમામ સુવિધાઓ ઉપલબ્ધ થશે. આ પ્લાન અંતર્ગત શહેરના અલગ-અલગ વિસ્તારોમાં લોજિસ્ટિક સુવિધાઓ વિકસાવવામાં આવશે, જેથી ટેક્સટાઇલ સહિતના વિવિધ ઉદ્યોગોને સીધો લાભ મળી શકે.
સુરત શહેરમાં બુલેટ ટ્રેન, મેટ્રો ટ્રેન, ડેડીકેટેડ ફ્રેઈટ કોરિડોર, દિલ્હી-મુંબઈ ઔદ્યોગિક કોરિડોર, રેલવે કોરિડોર, નેશનલ અને સ્ટેટ હાઈવે, એક્સપ્રેસ વે, આઉટર રિંગ રોડ, પોર્ટ અને એરપોર્ટ જેવી અનેક કનેક્ટિવિટી સુવિધાઓ ઉપલબ્ધ થવા જઈ રહી છે. આ તમામ સુવિધાઓ લોજિસ્ટિક્સ ક્ષેત્રના વિકાસમાં મહત્વની ભૂમિકા ભજવશે.
સૂત્રોના જણાવ્યા પ્રમાણે,આ પ્રોજેક્ટથી સુરતનો જીડીપી ગ્રોસ ડોમેસ્ટિક પ્રોડક્ટ વધશે અને સાથે સાથે લોકો માટે રોજગારીની નવી તકો પણ ઊભી થશે.
