સુરતઃ શહેરના લિંબાયત વિસ્તારમાં પતંગ પકડવા ગયેલા 12 વર્ષના કિશોર પર દીવાલ પડતાં મોત થયું હતું. મૃતક ત્રણ ભાઈ-બહેનમાં સૌથી નાનો હતો; તેમજ એક મહિના પહેલા જ નવી સ્કૂલમાં એડમિશન લીધું હતું. ઘટનાના પગલે સમગ્ર વિસ્તારમાં શોકનું મોજું ફરી વળ્યું હતું.
કેવી રીતે બની ઘટના
લિંબાયત વિસ્તારમાં રહેતો વિદ્યાર્થી પતંગ પકડવા માટે ગયો હતો. આ સમયે અચાનક એક જર્જરીત દીવાલ તૂટી પડી હતી. જેની નીચે દબાઈ ગયો હતો. ઘટનાની જાણ થતાં જ તેના પિતા દોડી આવ્યા હતા અને આસપાસના લોકોની મદદથી બહાર કાઢ્યો હતો. જે બાદ તેને સારવાર માટે ખસેડવામાં આવ્યો હતો.
હોસ્પિટલ પહોંચ્યા બાદ ફરજ પરના તબીબીઓ તેને તપાસીને મૃત જાહેર કર્યો હતો. છાતીના ભાગે ઈજા થવાથી તેનું ઘટના સ્થળે અથવા હોસ્પિટલ પહોંચતા પહેલા મૃત્યુ થયું હતું. મૃતકના વિદ્યાર્થીના પિતાના કહેવા પ્રમાણે, પહેલા તે મારૂતિનગર ઉર્દૂ સ્કૂલમાં ભણતો હતો અને 20 દિવસ પહેલા જ નવી સ્કૂલમાં એડમિશન લીધું હતું.
આ પણ વાંચો: ઉત્તરાયણ પહેલા જ સુરતમાં વરતાયો પતંગની દોરીનો કહેર, મજુરા ગેટ ફ્લાયઓવર બ્રિજ પર વ્યક્તિનું ગળું કપાયું…
ઉલ્લેખનીય છે કે ઉત્તરાયણના તહેવાર પહેલા સુરત શહેરમાં પતંગની ઘાતક દોરીનો કહેર શરૂ થઈ ગયો છે. વાહનચાલકોના ગળા કપાવવાના ગંભીર કિસ્સાઓ સામે આવી રહ્યા છે. થોડા દિવસ પહેલા શહેરના અડાજણ વિસ્તારની ભક્તિધામ સોસાયટીમાં રહેતા 45 વર્ષીય પશુપતિસિંહ નામના વ્યક્તિ સાથે આ દુર્ઘટના બની હતી. તેઓ મજૂરાગેટ બ્રિજ પરથી પસાર થઈ રહ્યા હતા તે દરમિયાન અચાનક પતંગની દોરી તેમના ગળા લાગતા અકસ્માત સર્જાયો હતો. દોરી એટલી ઘાતક હતી કે તેના કારણે તેમને ગંભીર ઈજા પહોંચી હતી. દોરી વાગતાં પશુપતિસિંહ લોહીલુહાણ હાલતમાં બ્રિજ પર જ નીચે પડી ગયા હતા. આ અકસ્માત સર્જાતા અન્ય વાહનચાલકો અને રાહદારીઓનું ટોળું તરત જ ઘટનાસ્થળે એકઠું થઈ ગયું હતું.
