નવસારી: સામાન્ય રીતે અકસ્માતની ઘટનાઓમાં ગંભીર ઈજાઓ કે મૃત્યુના કિસ્સાઓ સામે આવતા હોય છે, પરંતુ કેટલીકવાર એવા કિસ્સાઓ પણ બને છે જે ‘રામ રાખે તેને કોણ ચાખે’ કહેવતને સાર્થક કરે છે. આવો જ એક આશ્ચર્યજનક અને ચમત્કારિક કિસ્સો ગુજરાતના નવસારી જિલ્લાના ગણદેવીમાં બન્યો છે, જ્યાં એક ૩ વર્ષનું બાળક ફોર્ચ્યુનર કારની નીચે આવી ગયા બાદ પણ હેમખેમ બચી ગયું.
આ ઘટના ગણદેવીમાં બની હતી જ્યાં બાળક પોતાના ઘરની બહાર રમી રહ્યું હતું. અચાનક સામેથી એક ફોર્ચ્યુનર કાર આવી અને બાળક તેની નીચે આવી ગયું. જોકે, આ સમયે પરિવારના સભ્યો અને વાહનચાલકની ત્વરિત સતર્કતા અને સમયસૂચકતાએ બાળકના જીવનો આબાદ બચાવ કર્યો હતો.
સમગ્ર ઘટના બાળકના ઘરે લાગેલા સીસીટીવી કેમેરામાં કેદ થઈ ગઈ હતી. સીસીટીવી ફૂટેજમાં સ્પષ્ટપણે જોઈ શકાય છે કે કેવી રીતે બાળક રમતા રમતા અચાનક કારની નીચે આવી જાય છે અને કેવી રીતે તત્કાળ કાર્યવાહીથી તેનો જીવ બચી જાય છે. આ દ્રશ્યો ખરેખર હૃદયદ્રાવક હોવા છતાં બાળકના બચી જવાથી રાહતનો શ્વાસ લીધો હતો.
આ ઘટના દર્શાવે છે કે નાના બાળકોને ઘરની બહાર રમવા દેતી વખતે કેટલી કાળજી રાખવી જરૂરી છે. સદભાગ્યે આ કિસ્સામાં પરિવારજનો અને કારચાલકની સતર્કતાથી મોટી દુર્ઘટના ટળી હતી અને બાળકે જાણે મોતને હાથતાળી આપી હતી.
