અહેમદ પટેલના સંતાનો સામ સામેઃ ફૈઝલ નવી પાર્ટી બનાવવાના મૂડમાં, બહેન મુમતાઝે શું કરી સ્પષ્ટતા?

ભરૂચઃ કોંગ્રેસના દિગ્ગજ નેતા સ્વ. અહેમદ પટેલના સંતાનો સામ સામે આવ્યા છે. ફૈઝલ પટેલ નવી પાર્ટી બનાવવાના મૂડમાં છે. જ્યારે બહેન મુમતાઝ પટેલે તેને ભાઈની અંગત પોસ્ટ ગણાવી હતી.

ફૈઝલ પટેલે શું કરી પોસ્ટ

ફૈઝલ પટેલે સોશિયલ મીડિયામાં એક પોસ્ટ કરી હતી. જેમાં તેણે લખ્યું કે, મારી બહેન પણ કદાચ જોડાઈ શકે છે. હું કોંગ્રેસથી અલગ થઈને Congress (AP) પાર્ટી બનાવવા માંગુ છું. તમે લોકો તમારો અભિપ્રાય આપી શકો છો. ફૈઝલ પટેલની આ પોસ્ટ બાદ અનેક પ્રકારની ચર્ચા વહેતી થઈ છે.

મુમતાઝ પટેલે શું કરી સ્પષ્ટતા

ફૈઝલ પટેલની પોસ્ટ બાદ તેની બહેન મુમતાઝે પ્રતિક્રિયા આપી હતી. તેણે સ્પષ્ટતા કરતાં જણાવ્યું કે, આ તેના ભાઈની અંગત પોસ્ટ છે. હું કોઈપણ અન્ય પાર્ટીમાં જોડાવાની યોજના નથી બનાવી રહી. તેમજ કોઈપણ નવી પાર્ટી બનાવવાની પણ યોજના નથી. મારા ભાઈના વિચારો અને નિર્ણય તેના અંગત છે.

ઓગસ્ટ 2025માં ફૈઝલે પીએમ મોદીના કર્યા હતા વખાણ

ઓગસ્ટ 2025માં ફૈઝલ પટેલે એક ઈન્ટરવ્યુમાં વડા પ્રધાન નરેન્દ્ર મોદીના વખાણ કર્યા હતા.વડા પ્રધાન નરેન્દ્ર મોદીના નેતૃત્વને લઈને પૂછવામાં આવેલા પ્રશ્નના જવાબમાં ફૈઝલ પટેલે જણાવ્યું હતું કે તેનાથી સારું ન થઇ શકે. ઓપરેશન સિંદૂર મુદ્દે વાત કરતા તેમણે પીએમ મોદીના નેતૃત્વના વખાણ કર્યા હતા અને કહ્યું હતું કે તેમણે દેશને એક મોટા સંકટમાથી ઉગારી લીધો. તેમણે કહ્યું કે સૈન્ય દળોએ સારું કામ કર્યું, મને આપણા જવાનો, સૈન્ય દળો પર ગર્વ છે. જો કે તેમણે કહ્યું કે તેઓ થોડા સમય માટે રાજનીતિથી દૂર છે પરંતુ તેઓ કોંગ્રેસ પરિવારના સભ્ય છે. ફૈઝલ પટેલે વિદેશ પ્રધાન એસ. જયશંકરનાં પણ વખાણ કર્યા હતા. તેમણે કહ્યું હતું કે હું જયશંકરજીનું ખૂબ જ સન્માન કરું છું. જે રીતે પીએમ મોદીએ બ્યુરોક્રેટ્સને નેતા બનાવ્યા છે અને તેમને મંત્રાલયની જવાબદારી સોંપી છે તે ખૂબ સારું છે.

આ પણ વાંચો: અહમદ પટેલનો દીકરો નરેન્દ્ર મોદી પર ઓળઘોળ, શું કર્યા વખાણ ? કોંગ્રેસની કેવી કાઢી ઝાટકણી ?

આ ઇન્ટરવ્યુ દરમિયાન ફૈઝલ પટેલે કોંગ્રેસના નેતૃત્વ અંગે પણ વાત કરી હતી. તેમણે કહ્યું હતું કે, રાહુલ ગાંધી એક મહેનતું નેતા છે. કોંગ્રેસમાં કેટલાક ખૂબ જ તેજસ્વી અને બુદ્ધિશાળી નેતાઓ છે, જેમ કે શશિ થરૂર, ડી.કે. શિવકુમાર, રેવંત રેડ્ડી, દીપેન્દ્ર હુડ્ડા અને સચિન પાયલટ. આ બધા ખૂબ જ સક્ષમ નેતાઓ છે. પાર્ટીમાં આંતરિક સમસ્યાઓ છે અને મારું માનવું છે કે જે વરિષ્ઠ નેતાઓ પાર્ટી ચલાવી રહ્યા છે, તેમને યોગ્ય સલાહ મળતી નથી. તેમના સલાહકારો સારું કામ કરી રહ્યા નથી. તેઓ આવે છે અને જાય છે. વરિષ્ઠ નેતાઓની સલાહ પર ધ્યાન આપવામાં આવતું નથી.