મેરે અંગને મે તુમ્હારા ક્યાં કામ હૈ- ગાંઠિયા-ગોટાથી વિખ્યાત ગોંડલમાં કઈ વસ્તુ ચાઇનીઝ આવી ?
![](https://bombaysamachar.com/wp-content/uploads/2024/09/garlic.webp)
ગુજરાતભરમાં ગાંઠિયા -ભજીયા અને ગોટાના શહેર તરીકે વિખ્યાત એવા ગોંડલના માર્કેટિંગ યાર્ડમાં એક કૌતુક સર્જાયું. અહીના માર્કેટિંગ યાર્ડમાં આ વસ્તુ નજરે ચઢતા ઓહાપોહ મચી ગયો. અને આ કથિત પ્રતિબંધિત વસ્તુનો ભારે વિરોધ થવા સાથે તપાસનો ધમધમાટ પણ શરૂ થયો છે. મોટી માત્રમાં ઠલવાયેલા આ જથ્થાને અહીં લાવ્યું કોણ ? તે અંગે પૂરજોશમાં તપાસ થઈ રહી છે.
ગોંડલ માર્કેટિંગ યાર્ડમાં બે દિવસ પહેલાં થયેલી લસણની આવકમાં ચાઇનીઝ લસણ પણ 30 જેટલી બોરી (અંદાજે 600 કિલો) મળી આવતાં ઓહા -પોહ મચી ગયો છે અને તપાસનો ધમધમાટ ચાલુ કરી દેવામાં આવ્યો છે. સૌરાષ્ટ્રના અગ્રીમ ગણાતા ગોંડલ માર્કેટિંગ યાર્ડમાં હાલ અલગ – અલગ જણસની પુષ્કળ આવક ચાલુ છે. જેમાં બે દિવસ પહેલાં લસણની પણ મોટી આવક થઈ હતી. આ દરમિયાન ગોંડલ માર્કેટયાર્ડના કર્મચારીઓને ચાઇનીઝ લસણની 30 બોરી (અંદાજે 600 કિલો) નજરે ચડતા અધિકારીઓ ચોંકી ઉઠ્યા હતા.
![](https://bombaysamachar.com/wp-content/uploads/2024/09/images-2.jpeg)
અત્રે ઉલ્લેખનીય છે કે આરોગ્યની દૃષ્ટિએ હાનિકારક હોવાથી ભારત સરકારે ચાઇનીઝ લસણ પર પ્રતિબંધ મૂક્યો છે. કારણ કે ચાઇનીઝ લસણ હલકી ગુણવત્તાનું અને ખૂબ જ સસ્તું હોય છે. ભારતના ખેડૂતોને નુકસાન વેઠવું ન પડે તે માટે સરકારે પ્રતિબંધ લગાવેલો છે. આ મામલે માર્કેટિંગ યાર્ડના ચેરમેને ચાઇનીઝ લસણની 30 બોરી અલગ તારવી લઈને રાજ્ય સરકારનું માર્ગદર્શન માંગી. આ જથ્થો કોણે મંગાવ્યો અને કોણે મોકલ્યો? એ અંગે તપાસ શરુ કરાવી છે. જો ચાઇનીઝ લસણ ગુજરાતમાં આવશે તો ગુજરાતના ખેડૂતોને ભારે નુકસાન વેઠવું પડશે.