કડી અને વિસાવદર વિધાનસભા બેઠકો માટે 15 જૂન પહેલા પેટા ચૂંટણી યોજાવાની શક્યતા
અમદાવાદઃ ગુજરાત વિધાનસભાની કડી અને વિસાવદર વિધાનસભા બેઠકો માટે પેટા ચૂંટણી યોજાવાના સંકેત મળી રહ્યા છે. કેન્દ્રીય ચૂંટણી પંચે આ બંને બેઠકો માટે મતદાર યાદીની સંક્ષિપ્ત સુધારણા માટેનો કાર્યક્રમ જાહેર કર્યો છે, જે 8 એપ્રિલથી 24 એપ્રિલ સુધી ચલાવાશે. આ પ્રક્રિયા પૂર્ણ થયા બાદ 5 મે 2025 સુધીમાં સુધારેલી મતદાર યાદી જાહેર થશે અને આ બંને બેઠકો પર 15 જૂન પહેલા પેટા ચૂંટણી યોજાવાની સંભાવના છે.
અત્રે ઉલ્લેખનીય છે કે, કડી વિધાનસભા બેઠક પર ભાજપના ધારાસભ્ય કરસનભાઈ સોલંકીનું ગત ફેબ્રુઆરી 2025માં અવસાન થયું હતું. જ્યારે વિસાવદર વિધાનસભા બેઠક પર આમ આદમી પાર્ટીના ધારાસભ્ય ભુપતભાઈ ભાયાણીએ 2023માં રાજીનામું આપ્યું હતું. જેથી આ બંને બેઠક ખાલી પડી છે.
આ પણ વાંચો: ગુજરાતમાં પેટા ચૂંટણી માટે કોંગ્રેસ-‘આપ’નો ‘મરણિયો’ પ્રયાસ, સફળ રહ્યા તો હશે આ ‘પ્લાન’?
2022માં વિસાવદર બેઠક પરથી કોંગ્રેસના પાટીદાર નેતા હર્ષદ રીબડીયાએ જીત મેળવી હતી. જે બાદ બીજા જ વર્ષ તેઓએ કોંગ્રેસ છોડી ભાજપમાં જોડાઈ ગયા હતા, જેના કારણે આપના ભુપત ભાયાણીએ આ બેઠક પર વિજય મેળવ્યો હતો. રીબડીયાએ વિસાવદરની ચૂંટણીના પરિણામને હાઇકોર્ટમાં પડકારતા, આ બેઠક પર લાંબા સમય સુધી ચૂંટણી થઈ શકી નથી. હવે કાયદાકીય ગૂંચ ઉકેલાતા, પેટા ચૂંટણીનો માર્ગ મોકળો થયો છે.
નોંધવા જેવી બાબત એ છે કે વર્ષ 2022 પછી રાજ્યમાં ખંભાત, વિજાપુર, વાઘોડિયા, પોરબંદર અને માણાવદર સહિતની બેઠકો માટે પેટા ચૂંટણી યોજાઈ ચૂકી છે. નવેમ્બર 2024માં વાવ વિધાનસભાની પેટા ચૂંટણી યોજાઈ હતી, ત્યારે વિસાવદર માટે કોર્ટ કેસ પેન્ડિંગ હોવાને કારણે ત્યાં ચૂંટણી થઈ ન હતી. હવે કડી અને વિસાવદરની પેટા ચૂંટણી યોજવા માટે ચૂંટણી પંચે તૈયારીઓ શરૂ કરી છે.
રાજકીય રીતે કડી અને વિસાવદરની પેટા ચૂંટણી ભારે રસાકસીભરી રહી શકે છે. કારણ કે ભાજપ, કોંગ્રેસ અને આમ આદમી પાર્ટી ફરી એક વખત મેદાનમાં હશે. હવે, ચૂંટણી પંચની આગામી જાહેરાત પર સૌની નજર રહેશે.