Ahmadabad માં મોડી રાત્રે ગાજવીજ સાથે ધોધમાર વરસાદથી અનેક વિસ્તારમાં પાણી ભરાયા
અમદાવાદ : અમદાવાદ(Ahmadabad)શહેરમાં મોડી રાત્રે મોસમનો પ્રથમ વરસાદ(Rain)સવા ઈચ વરસાદ વરસ્યો છે.અમદાવાદ શહેરમાં સોમવારે વહેલી સવારે ધીમે ધારે વરસાદ વરસવાનુ શરૂ થયું હતું. ત્યાર બાદ દિવસ દરમિયાન વરસાદ બંધ રહ્યો હતો ત્યારે ફરી મોડી રાત્રે ગોતા, રાણીપ, વૈષ્ણદેવી, એસજી હાઈવે વેગેરે વિસ્તારોમાં વરસાદ પડ્યો હતો. આ ઉપરાંત સિવિલ હોસ્પિટલ, કુબેરનગર, નરોડા, સરખેજ, મેઘાણીનગર સહિતના વિસ્તારોમાં પણ અતિભારે વરસાદ વરસ્યો હતો. મોડી રાત્રે 12:30 વાગ્યાની આસપાસ શરૂ થયેલો વરસાદ બે કલાક સુધી અવિરત ચાલુ રહ્યો હતો.
નિકોલમાં દોઢ ઈંચ વરસાદ પડ્યો હતો
શહેરના વિરાટનગર, ઓઢવ, રખિયાલ, સૈજપુર વિસ્તારમાં બે ઇંચ વરસાદ પડ્યો હતો. ઉસ્માનપૂરા, વાડજ, આશ્રમ રોડ પર પણ બે ઇંચ વરસાદ પડ્યો હતો. રાણીપ, ચાંદખેડા, પાલડી, એલીસબ્રીજ, દુધેશ્રર, જમાલપુર, શાહપુર, ઠક્કરનગર, નિકોલમાં દોઢ ઈંચ વરસાદ પડ્યો હતો.
વરસાદના કારણે પડી જતાં બે વ્યક્તિ ફસાયા હતા
મોડી રાત્રે વરસાદ પડવાના કારણે નિકોલ રોડ અને ગુલબાઈ ટેકરા વિસ્તારમાં ઝાડ ધરાશાયી થવા અંગેનો કોલ ફાયર બ્રિગેડની ટીમને મળતા તાત્કાલિક ફાયર બ્રિગેડની ટીમ ત્યાં પહોંચી હતી અને ઝાડને દૂર કરવાની કાર્યવાહી કરવામાં આવી હતી. ભારે વરસાદના પગલે રાયપુર વિસ્તારમાં ચકલેશ્વર મહાદેવ પાસે લાલા વસાણી પોળમાં બે માળના મકાનનો અમુક ભાગ જર્જરિત હાલતમાં હતો. જે વરસાદના કારણે પડી જતાં બે વ્યક્તિ ફસાયા હતા.
અત્રે ઉલ્લેખનીય છે કે છેલ્લા ત્રણ ચાર દિવસથી દક્ષિણ ગુજરાતમાં વરસાદ વરસી રહ્યો છે. ત્યારે સોમવારે મોડી રાત્રે અમદાવાદ સહિત અનેક વિસ્તારોમાં વરસાદ વરસતા હવે ચોમાસું ધીરે ધીરે અન્ય ભાગોમાં આગળ વધી રહ્યું છે. રાજ્યમાં અત્યાર સુધીમાં 153 જેટલા તાલુકામાં સામાન્યથી લઈને અઢીં ઈંચ જેટલો વરસાદ વરસ્યો છે.
