Gujarat Assembly: અમદાવાદમાં 70% CCTV કેમેરા કામ ન કરતા હોવાનો ઈમરાન ખેડાવાલાનો આરોપ, સરકારે આપ્યો આ જવાબ
ગાંધીનગર: ગુજરાત વિધાનસભા ગૃહમાં ચર્ચા દરમિયાન કોંગ્રેસના વિધાનસભ્ય ઈમરાન ખેડાવાલાએ જણાવ્યું હતું કે અમદાવાદના રસ્તાઓ પર લાગેલા 70 ટકા સીસીટીવી કેમેરા કામ નથી કરતા અને તેના કારણે પોલીસને કેસની તપાસ કરવામાં મુશ્કેલી પડી રહી છે.
એક લેખિત જવાબમાં ગૃહ રાજ્ય પ્રધાન હર્ષ સંઘવીએ જણાવ્યું હતું કે અમદાવાદ શહેર અને જિલ્લામાં 2022 અને 2023માં પોલીસ દ્વારા ટ્રાફિક નિયમના ભંગ બદલ 21.07 લાખથી વધુ ઈ-મેમો જારી કરવામાં આવ્યા હતા. પોલીસે દંડ તરીકે 29 કરોડ રૂપિયાથી વધુ રકમ વસૂલ કરી છે.
આ અંગે ખેડાવાલાએ કહ્યું કે, “અમદાવાદ શહેરમાં, લગભગ 70 ટકા સીસીટીવી કેમેરા કાર્યરત સ્થિતિમાં નથી. જ્યારે અકસ્માત થાય છે, ત્યારે પોલીસને ગુનો ઉલેકવામાંમાં મુશ્કેલી પડે છે.”
આ અંગે હર્ષ સંઘવીએ જણાવ્યું હતું કે, “અમદાવાદ શહેરમાં 1,705 જેટલા CCTV કાર્યરત છે અને તે બિન-કાર્યરત છે તેવું વિચારીને કોઈએ ભૂલ કરવી જોઈએ નહીં.”
ખેડાવાલાએ કહ્યું કે શહેરમાં લગભગ 6,000 સીસીટીવી કેમેરા છે. જોકે સંઘવીએ કહ્યું કે આ આંકડો ખોટો છે. તેમણે ઉમેર્યું હતું કે શહેરમાં બે પ્રકારના સીસીટીવી કેમેરા લગાવવામાં આવ્યા છે – એક કેન્દ્ર સરકારના મિશન સ્માર્ટ સિટી પ્રોજેક્ટ હેઠળ અને બીજો રાજ્યના ગૃહ વિભાગ હેઠળના છે.