નવી દિલ્હીઃ ભારતીય મનોરંજન ઉદ્યોગ લાંબા સમયથી પાયરસીથી હેરાન છે, પરંતુ ગત વર્ષના તાજેતરના આંકડાએ સૌને ચોંકાવી દીધા છે. ભારતીય મનોરંજન ઉદ્યોગને ૨૦૨૩ માં મૂળ સામગ્રીની ચોરી એટલે કે પાયરસીને કારણે ૨૨,૪૦૦ કરોડ રૂપિયાનું મોટું નુકસાન થયું છે.
ઈવાય અને ઈન્ટરનેટ એન્ડ મોબાઈલ એસોસિએશન ઓફ ઈન્ડિયા દ્વારા જારી કરાયેલા ધ રોબ રિપોર્ટમાં આ માહિતી આપવામાં આવી છે. અહેવાલમાં જણાવ્યું છે કે મૂળ સામગ્રીની ચોરી (પાયરસી) ના જોખમોને અસરકારક રીતે ઘટાડવા માટે મજબૂત નિયમન અને સહયોગી પ્રયાસોની જરૂર છે. રિપોર્ટ અનુસાર ભારતમાં ૫૧ ટકા મીડિયા ઉપભોક્તા ગેરકાયદેસર સ્ત્રોતો (પાઇરેટેડ)માંથી મૂળ સામગ્રી મેળવે છે. આમાંથી મહત્તમ ૬૩ ટકા ઓનલાઈન પ્લેટફોર્મ દ્વારા થાય છે.
આ પણ વાંચો: ઇઝરાયલે લેબનાન પર ફરી હુમલો કર્યો, રોકેટમારામાં 12 થી વધુ લોકોના મોત
૨૦૨૩માં ભારતમાં ઓરિજિનલ કન્ટેન્ટની પાયરસી દ્વારા રૂ. ૨૨,૪૦૦ કરોડની કમાણી થઇ છે. તેમાંથી ૧૩ ૭૦૦ કરોડ રૂપિયા સિનેમાગૃહોમાં ગેરકાયદે રીતે બનાવેલા કન્ટેન્ટમાંથી, જ્યારે ઓટીટી પ્લેટફોર્મ પર બનેલા કન્ટેન્ટમાંથી ૮,૭૦૦કરોડ રૂપિયાની કમાણી થઈ હતી. એવો અંદાજ છે કે આના કારણે સંભવિત ₹ ૪,૩૦૦ કરોડ સુધીનું ગુડ્સ એન્ડ સર્વિસ ટેક્સનું નુકસાન થયું છે.
અહીં પાઈરસીનો અર્થ કોઈની કોપીરાઈટ કરેલી સામગ્રીની ગેરકાયદે નકલ, વિતરણ અથવા ઉપયોગ છે. આમાં સંગીત, મૂવી, સૉફ્ટવેર અને બૌદ્ધિક સંપત્તિ વગેરેનો સમાવેશ થાય છે. આને પાઈરસીનું એક સ્વરૂપ માનવામાં આવે છે કારણ કે તે મૂળ સર્જકોના અધિકારોનું ઉલ્લંઘન કરે છે અને તેમને નોંધપાત્ર નાણાકીય નુકસાન થઇ શકે છે. ઈન્ટરનેટ એન્ડ મોબાઈલ એસોસિએશન ઓફ ઈન્ડિયાની ડિજિટલ એન્ટરટેઈનમેન્ટ કમિટીના ચેરમેન રોહિત જૈને હિતધારકો વચ્ચે સામૂહિક પગલાં લેવાની તાત્કાલિક જરૂરિયાત પર ભાર મૂક્યો હતો.
આ પણ વાંચો: એમવીએ અને મહાયુતીમાં ફાયનલ થયું સિટ શેરિંગ? કોના ભાગે શું આવ્યું જાણો…
તેમણે કહ્યું હતું કે ભારતમાં ડિજિટલ એન્ટરટેઈનમેન્ટની ઝડપી વૃદ્ધિને નકારી શકાય નહીં. ફિલ્મ એન્ટરટેઈનમેન્ટ બિઝનેસ વર્ષ ૨૦૨૬ સુધીમાં રૂ. ૧૪,૬૦૦ કરોડ સુધી પહોંચવાની અપેક્ષા છે.
જોકે, મૂળ સામગ્રીની પાઈરસી આ શક્યતા માટે ગંભીર મુદ્દો છે. તમામ હિસ્સેદારો સરકારી સંસ્થાઓ, ઉદ્યોગના ખેલાડીઓ અને ગ્રાહકોએ આ સમસ્યાનો સામનો કરવા માટે એકસાથે આવવાની જરૂર છે. રિપોર્ટમાં કહેવામાં આવ્યું છે કે આવી સામગ્રી મોટાભાગે ૧૯થી ૩૪ વર્ષની વય જૂથના લોકોને આકર્ષે છે.
