કિંજલ દવેએ ન્યાત બહારના ફતવાને ઘોળીને પી જઈ સગાઈનું રીસેપ્શન યોજ્યું, કોણ કોણ રહ્યા હાજર ?

અમદાવાદઃ કિંજલ દવેએ ન્યાત બહારના ફતવાને ઘોળીને પી જઈ સગાઈનું રીસેપ્શન યોજ્યું હતું. જેમાં અનેક સેલિબ્રિટી હાજર રહ્યા હતા. આ અંગેના વીડિયો પણ વાયરલ થયા હતા.

અમદાવાદની એક ક્લબમાં યોજાયેલા સગાઈ રિસેપ્શનમાં ગીતા રબારી, ખજૂરભાઈ, હીતુ કનોડિયા અને તેની પત્ની, પ્રફુલ દવે, ઈશાની દવે, હાર્દિક દવે, રાકેશ બારોટ, જીગ્નેશ બારોટ, ઉર્વશી રાદડિયા, અલ્પા પટેલ, કાજલ મહેરિયા હાજર રહ્યા હતા. આ ઉપરાંત મોનલ ગજ્જર, તત્સત અને આરોહી, કુશલ મિસ્ત્રી, તરુણ જાની, ‘લાલો’ ફિલ્મની ટીમ પણ ઉપસ્થિત રહી હતી.

રિસેપ્શનમાં હાજરી આપવા આવેલા સેલેબ્સ ગરબે પણ ઘૂમ્યા હતા. સગાઈ રિસેપ્શનમાં કિંજલ દવે લાલ કલરની સાડીમાં જોવા મળી હતી. ઉલ્લેખનીય છે કે કિંજલ દવેની સગાઈનો વિવાદ છેલ્લા થોડા દિવસથી ચર્ચામાં છે. તેની આંતરજ્ઞાતિય સગાઈના વિવાદ વચ્ચે કિંજલ અને તેના પરિવારે સગાઈ રીસેપ્શનની ધામધૂમથી ઉજવણી કરી હતી.

શું છે સમગ્ર મામલો

ચાર ચાર બંગડી ગીતથી ગુજરાત સહિત દેશ-વિદેશમાં જાણીતી થયેલી ગુજરાતી સિંગર કિંજલ દવેએ તાજેતરમાં એક બિઝનેસમેન સાથે સગાઈ કરી હતી. આ બિઝનેસમેન બ્રહ્મ સમાજથી ન હોઈ અને આંતરજ્ઞાતિય છે તેવી ફરિયાદ સાથે ઔદિચ્ય બ્રહ્મ સમાજે વિરોધ નોંધાવ્યો હતો. કાંકરેજના શિહોરી ખાતે સમાજની મળેલી બેઠકમાં સિંગર કિંજલ દવેના પરિવારનો સામાજિક બહિષ્કાર કરવા નિર્ણય લેવાયો હતો. આંતરજ્ઞાતિય લગ્ન મુદ્દે પાંચ પરગણા ઔદિચ્ય બ્રહ્મ સમાજે નારાજગી રજૂ કરીને કિંજલ દવેના પિતા અને પરિવારને બ્રહ્મ સમાજમાંથી આજીવન બહાર કરવાની જાહેરાત કરી હતી.

ઔદિચ્ય બ્રહ્મ સમાજના આ નિર્ણય બાદ કિંજલ દવેએ સોશિયલ મીડિયા પોસ્ટ કરી હતી. તેણે કહ્યું જય માતાજી, હર મહાદેવ મિત્રો. મારા જીવનના એક નવા પડાવની શરૂઆતમાં પ્રેમ અને આશીર્વાદ આપનારા દરેકનો હું આભાર માનું છું. મારા સગપણને લઈને છેલ્લા ઘણા સમયથી મીડિયામાં અનેક તર્ક-વિતર્ક અને ચર્ચાઓ ચાલી રહી છે, જેને કારણે હું અત્યાર સુધી મૌન હતી. પણ હવે વાત જ્યારે મારા પરિવાર અને ખાસ કરીને મારા પિતા સુધી પહોંચી છે, ત્યારે એક દીકરી તરીકે મારાથી સહન થતું નથી અને તેથી આજે મારે બોલવું પડ્યું છે.

તેણે કહ્યું કે, એક બ્રહ્મ કન્યા હોવાનું મને ગૌરવ છે અને હું અહીંયા સુધી પહોંચી છું તેમાં શિક્ષિત અને સમજદાર બ્રહ્મ શક્તિઓ (બ્રહ્મ સમાજના લોકો)નો ખૂબ મોટો ફાળો રહ્યો છે. હું તો નસીબદાર છું કે મને અઢારેય વર્ણના લોકોનો પ્રેમ અને સપોર્ટ મળ્યો છે.

કિંજલ દવેએ સવાલ ઉઠાવ્યો કે, “જ્યારે દીકરીઓ તેજસ જેવા પ્લેન ઉડાડી રહી છે, સંસદમાં છે અને દેશને ગૌરવ અપાવી રહી છે, ત્યારે શું બે-ચાર અસામાજિક તત્વો નક્કી કરશે કે એક દીકરીનો લાઈફ પાર્ટનર કોણ હશે? શું એક દીકરીને પોતાનો જીવનસાથી પસંદ કરવાનો હક નથી?

આ પણ વાંચો…હવે કિંજલ દવેના પિતા પણ મેદાનમાં, ઈન્સ્ટા પર પોસ્ટ મૂકીને શું કહ્યું ?