ચેક બાઉન્સ કેસ: રામ ગોપાલ વર્મા વિરુદ્ધ કોર્ટે બિનજામીનપાત્ર વૉરન્ટ જારી કર્યું

મુંબઈ: બોલીવૂડમાં રામુ તરીકે જાણીતા પ્રોડ્યુસર-ડિરેક્ટર રામ ગોપાલ વર્માની મુશ્કેલી વધી છે. ચેક બાઉન્સ કેસમાં થયેલી જેલની સજા વિરુદ્ધ વર્માએ કરેલી અરજી સેશન્સ કોર્ટે ફગાવી દીધી હતી અને તેની સામે બિનજામીનપાત્ર વૉરન્ટ જારી કરવામાં આવ્યું છે.

અગાઉ 21 જાન્યુઆરીએ અંધેરીમાં જ્યુડિશિયલ મેજિસ્ટ્રેટ (ફર્સ્ટ ક્લાસ) વાય. પી. પૂજારીએ નેગોશિયેલબ ઇન્સ્ટ્રુમેન્ટ એક્ટની જોગવાઇઓ હેઠળ સજાપાત્ર ગુના માટે વર્માને કસૂરવાર ઠેરવ્યો હતો. મેજિસ્ટ્રેટે વર્માને ત્રણ મહિનાની જેલની સજા અને ત્રણ મહિનાની અંદર 3.72 લાખ રૂપિયા ફરિયાદીને ચૂકવવાનો આદેશ આપ્યો હતો.

વર્માએ ત્યાર બાદ સજા મોકૂફ રાખવા માટે સેશન્સ કોર્ટમાં અપીલ કરી હતી. એડિશનલ સેશન્સ જજ એ.એ. કુલકર્ણીએ 4 માર્ચે વર્માની અરજી ફગાવી દીધી હતી અને કોર્ટ સમક્ષ હાજર થવા તેની વિરુદ્ધ બિનજામીનપાત્ર વૉરન્ટ જારી કર્યું છે.

આ પણ વાંચો: …ફિલ્મ પ્રોડ્યુસર રામ ગોપાલ વર્મા જેલમાં જશે, જાણો શું છે મામલો?

ઉપરાંત સજા મોકૂફ રાખવાની તેની અરજી નકારી કાઢી છે. આ મામલો વૉરન્ટની અમલબજવણી માટે 27 જુલાઇ પર મોકૂફ રખાયો છે. આરોપી કોર્ટ સમક્ષ હાજરી આપ્યા બાદ જામીન માટે અરજી કરી શકે છે, એમ જજે કહ્યું હતું.

વર્માની કંપની વિરુદ્ધ ફરિયાદી કંપનીએ વર્ષ 2018માં ચેક બાઉન્સ અંગે ફરિયાદ નોંધાવી હતી. એડવોકેટ રાજેશ કુમાર પટેલ ફરિયાદીની કંપની વતી હાજર રહ્યા હતા. તેમણે મેજિસ્ટ્રેટ કોર્ટ સમક્ષ એફિડેવિટ નોંધાવી હતી કે કંપની છેલ્લાં અનેક વર્ષથી હાર્ડ ડિસ્ક્સ પૂરી પાડવાના વ્યવસાયમાં સંકળાયેલી છે.

આરોપીની વિનંતી પર તેને ફેબ્રુઆરી, 2018 અને માર્ચ, 2018 વચ્ચે હાર્ડ ડિસ્કસ પૂરી પાડવામાં આવી હતી, જેને આધારે 2.38 લાખ રૂપિયાના વિવિધ ટેક્સ ઇન્વોઇસ ઊભાં કરાયાં હતાં.

આ પણ વાંચો: રામ ગોપાલ વર્મા ફરી વિવાદમાં ફસાયા, સોશિયલ મીડિયા પર આવી પોસ્ટ બદલ કેસ નોંધાયો

આરોપીએ ફરિયાદીને 1 જૂન, 2018ના રોજ ચેક આપ્યો હતો, જે અપૂરતા ભંડોળને કારણે બાઉન્સ થયો હતો, એમ એડવોકેટે જણાવ્યું હતું.

વર્માની કંપનીના ધ્યાનમાં આ વાત લવાતાં તે જ રકમનો બીજો ચેક જારી કરાયો હતો, જે પણ બાઉન્સ થયો હતો. તેમાં કારણ ‘અદાકર્તા દ્વારા પેમેન્ટ રોકવામાં આવ્યું છે’ એવો સંદેશ આપવામાં આવ્યો હતો. બાદમાં ફરિયાદીએ કાનૂની લડતનો માર્ગ અપવાન્યો હતો.

(પીટીઆઇ)