પાંખાં કામકાજે આયાતી તેલમાં ટકેલું વલણ

(વાણિજ્ય પ્રતિનિધિ તરફથી)
મુંબઈઃ શિકાગો ખાતે સોયાતેલના વાયદામાં ગઈકાલે 17 સેન્ટનો સુધારો આવ્યો હોવાના ઓવરનાઈટ અહેવાલ તેમ જ આજે મલયેશિયાના બુર્સા મલયેશિયા ડેરિવેટીવ્સ એકસચેન્જ ખાતે ક્રૂડ પામતેલના વાયદામાં સાધારણ સાત રિંગિટ ઘટી આવ્યાના નિર્દેશ હતા. આમ વિશ્વ બજારનાં મિશ્ર અહેવાલ ઉપરાંત હાજર, ડાયરેક્ટ ડિલિવરી તેમ જ સેલરિસેલ ધોરણે કામકાજો પાંખાં રહ્યાં હોવાથી સ્થાનિક જથ્થાબંધ ખાદ્યતેલ બજારમાં એકમાત્ર સરસવના ભાવમાં જોવા મળેલા 10 કિલોદીઠ રૂ. પાંચના ઘટાડાને બાદ કરતાં અન્ય તમામ દેશી-આયાતી તેલમાં ટકેલું વલણ રહ્યું હતું.

દરમિયાન આજે કાર્ગો સર્વેયર ઈન્ટરટેક સર્વિસીસ દ્વારા જાહેર કરવામાં આવેલી પ્રાથમિક આંકડાકીય માહિતી અનુસાર ગત તા. 1થી 10 સપ્ટેમ્બર દરમિયાન મલયેશિયાની પામતેલની નિકાસ આગલા ઑગસ્ટ મહિનાના સમાનગાળાના 4,82,576 ટન સામે 11.65 ટકા વધીને 5,38,780 ટનની સપાટીએ રહી હોવાનો અંદાજ મૂક્યો હોવાના અહેવાલ હતા.

આજે સ્થાનિકમાં ડાયરેક્ટ ડિલિવરી શરતે 10 કિલોદીઠ ઈમામીના આરબીડી પામોલિનના રૂ. 1270, સોયા રિફાઈન્ડના રૂ. 1260 અને સનફ્લાવર રિફાઈન્ડના રૂ. 1425, એડબ્લ્યુએલના આરબીડી પામોલિનના રૂ. 1260, સોયા રિફાઈન્ડના રૂ. 1255 અને સન રિફાઈન્ડના રૂ. 1425, પતંજલિ ફૂડ્સના આરબીડી પામોલિનના રૂ. 1280, સોયા રિફાઈન્ડના રૂ. 1275 અને સનફ્લાવર રિફાઈન્ડના રૂ. 1410, ગોકુલ એગ્રોના નવેમ્બર ડિલિવરી શરતે આરબીડી પામોલિનના રૂ. 1280 અને રિલાયન્સ રિટેલના સોયા રિફાઈન્ડના રૂ. 1247 ક્વૉટ થઈ રહ્યા હતા, પરંતુ વેપારો નિરસ રહ્યા હતા.

આજે સ્થાનિકમાં હાજરમાં વિવિધ દેશી-આયાતી ખાદ્યતેલના 10 કિલોદીઠ ભાવમાં આરબીડી પામોલિનના રૂ. 1275, સોયા રિફાઈન્ડના રૂ. 1275, સન રિફાઈન્ડના રૂ. 1420, સિંગતેલના રૂ. 1380, કપાસિયા રિફાઈન્ડના રૂ. 1350 અને સરસવના રૂ. 1600ના મથાળે રહ્યા હતા. આ સિવાય આજે ગુજરાતનાં મથકો પર સિંગતેલમાં તેલિયા ટીનના વેપાર 15 કિલોદીઠ રૂ. 2150માં અને લૂઝમાં 10 કિલોદીઠ રૂ. 1345માં થયાના અહેવાલ હતા.

આ પણ વાંચો…ફેડરલના ગવર્નર કૂકને દૂર કરવાના સંકેતે ડૉલર ઈન્ડેક્સ નબળો પડ્યો