હાજર ખાંડમાં નરમાઈ, નાકા ડિલિવરીમાં સુધારો

(વાણિજ્ય પ્રતિનિધિ તરફથી)
નવી મુંબઈઃ મહારાષ્ટ્રની ખાંડ મિલો પર ગઈકાલે સ્મોલ ગે્રડની ખાંડમાં સ્થાનિક તેમ જ દેશાવરોની માગ મર્યાદિત રહેતાં ટેન્ડરોમાં વેપાર ક્વિન્ટલે રૂ. 15ના ઘટાડા સાથે રૂ. 3825થી 3865માં થયાના અહેવાલ સાથે સ્થાનિક જથ્થાબંધ ખાંડ બજારમાં પણ સપ્તાહના અંતે ખાસ કરીને હાજરમાં રિટેલ સ્તરની માગ ખપપૂરતી રહેતાં સ્મોલ ગે્રડની ખાંડના ભાવમાં ઉપલા મથાળેથી ક્વિન્ટલે રૂ. આઠનો અને મિડિયમ ગે્રડની ખાંડમાં નીચલા મથાળેથી ક્વિન્ટલે રૂ. 10નો ઘટાડો આવ્યો હતો. જોકે, આજે નાકા ડિલિવરી ધોરણે ઔદ્યોગિક વપરાશકારોની આગામી દિવાળીના તહેવારોની અપેક્ષિત માગને ધ્યાનમાં લેતા લેવાલીમાં વધારો થવાથી સ્મોલ ગે્રડની ખાંડના ભાવમાં ક્વિન્ટલે રૂ. 10નો અને મિડિયમ ગે્રડની ખાંડમાં ઉપલા મથાળેથી ક્વિન્ટલે રૂ. 10નો સુધારો આવ્યો હતો.
બજારનાં સાધનોના જણાવ્યાનુસાર આજે સ્થાનિકમાં અંદાજે 29થી 30 ટ્રકની આવક સામે સ્ટોકિસ્ટોની નવી લેવાલીનો અભાવ તેમ જ રિટેલ સ્તરની માગ છૂટીછવાઈ ખપપૂરતી રહેતાં ઉપાડ લગભગ 27થી 28 ટ્રકનો રહ્યો હતો. આમ એકંદરે ખપપૂરતી માગ રહેતાં હાજરમાં સ્મોલ ગે્રડની ખાંડના વેપાર ઉપલા મથાળેથી ક્વિન્ટલે રૂ. આઠના ઘટાડા સાથે રૂ. 4002થી 4052માં થયા હતા, જ્યારે મિડિયમ ગે્રડની ખાંડના વેપાર નીચલા મથાળેથી ક્વિન્ટલે રૂ. 10ના ઘટાડા સાથે રૂ. 4046થી 4110માં થયા હતા.
વધુમાં આજે નાકા ડિલિવરી ધોરણે આગામી તહેવારોની અપેક્ષિત માગને ધ્યાનમાં લેતા ઔદ્યોગિક વપરાશકારોની પ્રબળ માગ રહેતાં સ્મોલ ગે્રડની ખાંડના વેપાર ક્વિન્ટલે રૂ. 10ના સુધારા સાથે રૂ. 3910થી 3940માં થયા હતા, જ્યારે મિડિયમ ગે્રડની ખાંડના વેપાર ઉપલા મથાળેથી ક્વિન્ટલે રૂ. 10ના સુધારા સાથે રૂ. 3940થી 3980માં થયાના અહેવાલ હતા.