(વાણિજ્ય પ્રતિનિધિ તરફથી)
નવી મુંબઈઃ મહારાષ્ટ્રની ખાંડ મિલો પર ગઈકાલે સ્થાનિક તેમ જ દેશાવરોની માગને ટેકે સ્મોલ ગ્રેડની ખાંડનાં ટેન્ડરોમાં વેપાર ક્વિન્ટલે રૂ. 3870થી 3910માં ટકેલા ધોરણે થયાના અહેવાલ હતા. વધુમાં આજે સ્થાનિક જથ્થાબંધ ખાંડ બજારમાં પણ ગઈકાલની દશેરા તથા ગાંધી જયંતીની જાહેર રજા પશ્ચાત્ એકંદરે કામકાજો ખપપૂરતા રહેતાં હાજરમાં તેમ જ નાકા ડિલિવરી ધોરણે ઔદ્યોગિક વપરાશકારોની માગ જળવાઈ રહેતાં ભાવમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સ્થાનિકમાં અંદાજે 30થી 32 ટ્રકની આવક સામે સ્ટોકિસ્ટોની નવી લેવાલીનો અભાવ અને રિટેલ સ્તરની માગ ખપપૂરતી જળવાઈ રહેતાં ઉપાડ લગભગ 29થી 30 ટ્રકનો રહ્યો હતો. આમ એકંદરે માગ જળવાઈ રહેતાં હાજરમાં સ્મોલ ગ્રેડની ખાંડના વેપાર ક્વિન્ટલે રૂ. 4012થી 4072માં અને મિડિયમ ગ્રેડની ખાંડના વેપાર ક્વિન્ટલે રૂ. 4062થી 4142માં ગુણવત્તાનુસાર ટકેલા ધોરણે થયા હતા.
આ પણ વાંચો: સ્મોલ ગ્રેડની ખાંડમાં સાધારણ નરમાઈ
વધુમાં આજે નાકા ડિલિવરી ધોરણે પણ દશેરાનાં તહેવારો પશ્ચાત્ માગ પ્રમાણમાં ઓછી રહી હોવા છતાં મથકો પર ભાવમાં મક્કમ અન્ડરટોન રહ્યો હોવાથી સ્મોલ ગ્રેડની ખાંડના વેપાર ક્વિન્ટલે રૂ. 3935થી 3960માં અને મિડિયમ ગ્રેડના વેપાર ક્વિન્ટલે રૂ. 3970થી 4020માં ટકેલા ધોરણે થયાના અહેવાલ હતા.
