(વાણિજ્ય પ્રતિનિધિ તરફથી)
નવી મુંબઈઃ મહારાષ્ટ્રની ખાંડ મિલો પર સ્થાનિક તેમ જ દેશાવરોની સ્મોલ ગે્રડની ખાંડમાં માગ મર્યાદિત રહેતાં તાજેતરમાં મથકો પર ટેન્ડરોમાં નરમાઈનું વલણ રહેતું હોવાના નિર્દેશો સાથે આજે સ્થાનિક જથ્થાબંધ ખાંડ બજારમાં પણ સપ્તાહના આરંભે હાજર ભાવમાં ક્વિન્ટલે રૂ. 10નો ઘટાડો આવ્યો હતો. તેમ જ મથકો પાછળ નાકા ડિલિવરી ધોરણે પણ ભાવ ક્વિન્ટલે રૂ. 10 ઘટી આવ્યાના અહેવાલ હતા.
બજારનાં સાધનોના જણાવ્યાનુસાર આજે સ્થાનિકમાં અંદાજે 28થી 29 ટ્રકની જળવાઈ રહેલી આવક સામે સ્ટોકિસ્ટોની નવી લેવાલીનો અભાવ રહ્યો હતો. તેમ જ રિટેલ સ્તરની માગ પણ ખપપૂરતી મર્યાદિત રહેતાં ઉપાડ લગભગ 27થી 28 ટ્રકનો રહ્યો હતો.
વધુમાં એકંદરે માગ ખપપૂરતી રહેતાં હાજરમાં સ્મોલ ગે્રડની ખાંડના વેપાર નીચલા મથાળેથી ક્વિન્ટલે રૂ. 10ના ઘટાડા સાથે રૂ. 3992થી 4052માં થયા હતા, જ્યારે મિડિયમ ગે્રડની ખાંડના વેપાર ઉપલા અને નીચલા મથાળેથી રૂ. 10ના ઘટાડા સાથે રૂ. 4036થી 4100માં ગુણવત્તાનુસાર ધોરણે થયા હતા.
વધુમાં આજે નાકા ડિલિવરી ધોરણે ઔદ્યોગિક વપરાશકારોની ખપપૂરતી માગ તેમ જ મથકો પરનાં નિરુત્સાહી નિર્દેશો સાથે ભાવમાં ક્વિન્ટલે રૂ. 10નો ઘટાડો જોવા મળ્યો હતો, જેમાં સ્મોલ ગે્રડની ખાંડના વેપાર ક્વિન્ટલે રૂ. 3900થી 3930માં અને મિડિયમ ગે્રડની ખાંડના વેપાર ક્વિન્ટલે રૂ. 3930થી 3970માં થયાના અહેવાલ હતા.
