વડોદરાઃ સરકારના ઈઝ ઑફ ડુઈંગ બિઝનૅસમાં સુધારાલક્ષી પગલાંઓ હાથ ધરતા અર્થતંત્રમાં સુધારો જોવા મળ્યો છે અને ગત સપ્ટેમ્બરના અંતે પૂરા થયેલા ત્રિમાસિકગાળામાં દેશનો આર્થિક વૃદ્ધિદર 8.2 ટકાની ઊંચી સપાટીએ જોવા મળ્યો છે. વધુમાં વૈશ્વિક વેપારોમાં અનિશ્ચિતતા પ્રવર્તી રહી છે ત્યારે દેશની નિકાસ પણ સ્વસ્થ વૃદ્ધિ દાખવી રહી હોવાનું વાણિજ્ય અને ઉદ્યોગ ખાતાના પ્રધાન પીયૂષ ગોયલે જણાવ્યું છે.
અત્રે સરદાર વલ્લભભાઈ પટેલની 150મી જન્મજયંતીની ઉજવણીના ભાગરૂપે યોજાયેલ રાષ્ટ્રીય પદયાત્રામાં ભાગ લેતા જણાવ્યું હતું કે 8.2 ટકાનો વૃદ્ધિદર સરકાર દ્વારા સ્થાનિક ઉત્પાદનને વેગ આપવા અને વ્યવસાય કરવાની સરળતાને પ્રોત્સાહન આપવા માટે લીધેલા ઘણાં પગલાંઓ પ્રતિબિંબિત કરે છે. નોંધનીય બાબત એ છે કે ગુજરાત સરકાર દ્વારા જન્મજયંતીની ઉજવણી નિમિત્તે રાજ્યના નર્મદા જિલ્લામાં કરમસદથી સ્ટેચ્યુ ઑફ યુનિટી સુધી પદયાત્રાનું આયોજન કરવામાં આવ્યું છે.
વૃદ્ધિના આ આંકડાઓ અમુક ક્વૉર્ટર્સ દ્વારા કરવામાં આવેલા દાવાઓને નકારી કાઢ્યા છે અને દર્શાવે છે કે ભારત સૌથી ઝડપથી વિકસી રહેલું અર્થતંત્ર છે, એમ જણાવતા તેમણે ઉમેર્યું હતું કે આપણે અવિરત વૃદ્ધિ જોવાનું ચાલુ રાખી શકીશું તેમ જ એપ્રિલથી ઑક્ટોબર દરમિયાન દેશની મર્કન્ડાઈઝ અને સર્વિસીસ નિકાસમાં પણ ઉચ્ચ વૃદ્ધિ નોંધાઈ છે.
વર્તમાન નાણાકીય વર્ષમાં ગત એપ્રિલથી ઑક્ટોબર દરમિયાન દેશની મર્કન્ડાઈઝ નિકાસ સાધારણ 0.63 ટકા વધીને 254.25 અબજ ડૉલરના સ્તરે અને આયાત 6.37 ટકા વધીને 451.08 અબજ ડૉલરની સપાટીએ રહી છે, જ્યારે આ સમયગાળામાં દેશની સર્વિસીસ નિકાસ ગત સાલના સમાનગાળાના 216.45 અબજ ડૉલર સામે વધીને 237.55 અબજ ડૉલરના સ્તરે રહી છે.
વર્તમાન નાણાકીય વર્ષના પહેલા ત્રિમાસિકગાળામાં 7.8 ટકા જીડીપી (ગ્રોસ ડૉમૅસ્ટિક પ્રોડક્ટ) રહ્યા બાદ સપ્ટેમ્બર અંતના બીજા ત્રિમાસિકગાળાનો 8.2 ટકા વૃદ્ધિદર રહેતાં ભારતે સૌથી વધુ ઝડપભેર વિકસી રહેલા અર્થતંત્રનું સ્થાન જાળવી રાખ્યું હોવાનું અધિકૃત યાદીમાં જણાવાયું છે. નોંધનીય બાબત એ છે કે તહેવારોની મોસમ પૂર્વે જીએસટીનાં દરનું તાર્કિકરણ કરીને સુધારો કરવામાં આવ્યો હોવાથી અપેક્ષિત માગ વૃદ્ધિને ધ્યાનમાં લેતા ઉત્પાદનમાં થયેલી વૃદ્ધિને કારણે જીડીપીમાં નોંધપાત્ર વધારો જોવા મળ્યો છે.
