(વાણિજ્ય પ્રતિનિધિ તરફથી)
મુંબઈઃ સ્થાનિક ઈક્વિટી માર્કેટમાં સુધારાતરફી વલણ ઉપરાંત ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 1308.16 કરોડની ચોખ્ખી લેવાલી રહી હોવાના નિર્દેશ હોવાથી તેમ જ આજે વિશ્વ બજારમાં ડૉલર ઈન્ડેક્સ તથા બે્રન્ટ ક્રૂડતેલના વાયદામાં ભાવ ઘટી આવ્યા હોવાથી આજે સ્થાનિક ફોરેક્સ માર્કેટમાં ડૉલર સામે રૂપિયો સત્ર દરમિયાન 29 પૈસા સુધી મજબૂત થયા બાદ અંતે ગઈકાલના બંધ સામે સાત પૈસા ઊંચકાઈને 88.72ના મથાળે બંધ રહ્યો હતો.
જોકે, ગઈકાલે વિશ્વ બજારમાં ડૉલર ઈન્ડેક્સ વધીને 99ની સપાટી પાર કરી ગયો હોવાથી રૂપિયામાં સુધારો મર્યાદિત રહ્યો હોવાનું ટ્રેડરોએ જણાવ્યું હતું.
આપણ વાંચો: ડૉલર સામે રૂપિયો પાંચ પૈસા તૂટીને ઐતિહાસિક તળિયે
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.79ના બંધ સામે સાધારણ નરમાઈના અન્ડરટોને 88.80ની સપાટીએ ખૂલ્યા બાદ સત્ર દરમિયાન નીચામાં 88.80 અને ઉપરમાં 88.50 સુધી મજબૂત થયા બાદ અંતે સાધારણ સાત પૈસાના સુધારા સાથે 88.72ની સપાટીએ બંધ રહ્યો હતો.
એકંદરે વિશ્વ બજારમાં બે્રન્ટ ક્રૂડતેલના વાયદામાં નરમાઈ, અમેરિકી ગવર્મેન્ટ શટડાઉનને કારણે ફેડરલ રિઝર્વ દ્વારા વ્યાજદરમાં કપાતની શક્યતાઓ પ્રબળ બની હોવાથી આગામી ટૂંકા સમયગાળા દરમિયાન ડૉલર સામે રૂપિયામાં સુધારાતરફી વલણ જળવાઈ રહે તેવી શક્યતા વ્યક્ત કરતા મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે અમારા મતે ડૉલર સામે રૂપિયાની રેન્જ 88.40થી 88.85 આસપાસની રહે તેમ જણાય છે.
દરમિયાન આજે વિશ્વ બજારમાં ડૉલર ઈન્ડેક્સ વધ્યા મથાળેથી 0.21 ટકા ઘટીને 99.32 આસપાસ અને બે્રન્ટ ક્રૂડતેલના વાયદામાં ભાવ 0.61 ટકા ઘટીને બેરલદીઠ 64.85 ડૉલર આસપાસ ક્વૉટ થઈ રહ્યો હતો, જ્યારે સ્થાનિક સ્તરે બીએસઈ બૅન્ચમાર્ક સેન્સેક્સ અને એનએસઈ બૅન્મચાર્ક નિફ્ટીમાં અનુક્રમે 328.72 પૉઈન્ટનો અને 103.55 પૉઈન્ટનો સુધારો આવ્યો હોવાથી રૂપિયાના સુધારાને ટેકો મળ્યો હોવાનું સૂત્રોએ ઉમેર્યું હતું.
