(વાણિજ્ય પ્રતિનિધિ તરફથી)
મુંબઈઃ આંતરરાષ્ટ્રીય વિનિમય બજારમાં ડૉલર ઈન્ડેક્સમાં મજબૂત વલણ રહ્યું હોવાના અહેવાલ ઉપરાંત આજે સ્થાનિક ઈક્વિટી માર્કેટમાં નરમાઈ અને ગઈકાલે વિદેશી સંસ્થાકીય રોકાણકારોની ઈક્વિટીમાં ચોખ્ખી વેચવાલી રહી હોવાના એક્સચેન્જના અહેવાલોને ધ્યાનમાં લેતા આજે સ્થાનિક ફોરેક્સ માર્કેટમાં ડૉલર સામે રૂપિયો 13 પૈસા ગબડીને 88.81ના નવાં તળિયે બંધ રહ્યો હતો.
જોકે, આજે સંભવિતપણે રિઝર્વ બૅન્કના બજારમાં હસ્તક્ષેપ અને બે્રન્ટ ક્રૂડતેલના વાયદામાં ભાવ ઘટાડાતરફી રહ્યા હોવાથી રૂપિયામાં મોટો કડાકો અટક્યો હોવાનું ફોરેક્સ ટ્રેડરોએ જણાવ્યું હતું.
આપણ વાંચો: ડૉલર સામે રૂપિયો સાત પૈસા ઊંચકાયો
આજે સ્થાનિકમાં ડૉલર સામે રૂપિયો ગઈકાલના 88.68ના બંધ સામે નરમાઈના અન્ડરટોને 88.73ના મથાળે ખૂલ્યા બાદ સત્ર દરમિયાન નીચામાં 88.81 અને ઉપરમાં 88.73ની રેન્જમાં રહ્યા બાદ અંતે 13 પૈસાના ઘટાડા સાથે 88.81ના મથાળે બંધ રહ્યો હતો. આ પૂર્વે ગત 30મી સપ્ટેમ્બરના રોજ ડૉલર સામે રૂપિયો 88.80ના તળિયે બંધ રહ્યો હતો.
નિષ્ણાતોના મતાનુસાર હાલના તબક્કે ભારત-અમેરિકા વચ્ચેની ટ્રેડ ટૅરિફની રૂપિયા પર માઠી અસર પડી રહી છે. જો ફેડરલ રિઝર્વ વ્યાજદરમાં વધુ કાપ મૂકે તેવો આશાવાદ વધવાની સાથે આગામી દિવસોમાં બે્રન્ટ ક્રૂડતેલના વાયદામાં નરમાઈનું વલણ જળવાઈ રહે અને વિદેશી સંસ્થાકીય રોકાણકારોનો ઈક્વિટીમાં આંતરપ્રવાહ રહે તો રૂપિયાના સુધારાને ટેકો મળી શકે, એમ મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે અમારા મતે આગામી ટૂંકા સમયગાળા દરમિયાન ડૉલર સામે રૂપિયાની રેન્જ 88.50થી 89 આસપાસની રહે તેવી શક્યતા નકારી ન શકાય.
આપણ વાંચો: ડૉલર સામે રૂપિયો પાંચ પૈસા તૂટીને ઐતિહાસિક તળિયે
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.10 ટકા વધીને 99.36 આસપાસ ક્વૉટ થઈ રહ્યો હતો. આ સિવાય આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 297.07 પૉઈન્ટનો અને 81.85 પૉઈન્ટનો ઘટાડો આવ્યો હોવાથી અને ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 240.10 કરોડની ચોખ્ખી વેચવાલી રહી હોવાથી રૂપિયો દબાણ હેઠળ રહ્યો હતો.
જોકે, આજે એકમાત્ર વિશ્વ બજારમાં બે્રન્ટ ક્રૂડતેલના વાયદામાં ભાવ આગલા બંધ સામે 2.15 ટકા તૂટીને બેરલદીઠ 61.99 ડૉલર આસપાસ ક્વૉટ થઈ રહ્યા હોવાથી રૂપિયાને અમુક અંશે ટેકો મળ્યો હોવાનું સૂત્રોએ જણાવ્યું હતું.
