(વાણિજ્ય પ્રતિનિધિ તરફથી)
મુંબઈઃ આંતરરાષ્ટ્રીય વિનિમય બજારમાં ડૉલર ઈન્ડેક્સમાં એકંદરે નરમાઈનો અન્ડરટોન અને બે્રન્ટ ક્રૂડતેલના વાયદામાં ઘટાડા ઉપરાંત અમેરિકા સાથે ટ્રેડ ડીલ થઈ જવાના આશાવાદ સાથે ઈક્વિટી માર્કેટમાં પણ સુધારાતરફી વલણ જોવા મળતાં આજે સ્થાનિક ફોરેક્સ માર્કેટમાં સતત ચોથા સત્રમાં ડૉલર સામે રૂપિયામાં સુધારાતરફી વલણ જળવાઈ રહેતાં 24 પૈસા ઉછળીને અંદાજે અઢી સપ્તાહની ઊંચી 87.85ની સપાટીએ બંધ રહ્યો હતો. જોકે, આજે અમેરિકી ફેડરલ રિઝર્વ આજે બેઠકના અંતે વ્યાજદરમાં કાપ મૂકે છે કે નહીં તેનાં પર બજાર વર્તુળોની મીટ મંડાયેલી રહેશે, એમ ફોરેક્સ ટ્રેડરોએ જણાવ્યું હતું.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.09ના બંધ સામે સુધારાના અન્ડરટોને 87.84ની સપાટીએ ખૂલ્યા બાદ સત્ર દરમિયાન નીચામાં 87.86 અને ઉપરમાં 87.71ની રેન્જમાં રહ્યા બાદ ગઈકાલના બંધ સામે 24 પૈસા વધીને 87.85ના મથાળે બંધ રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયો સાત પૈસાના સુધારા સાથે 88.09ના મથાળે બંધ રહ્યો હતો.
આ પણ વાંચો : ડૉલર સામે રૂપિયો આઠ પૈસા ઊંચકાયો
હાલમાં બજાર વર્તુળો અમેરિકી ફેડરલ રિઝર્વ વ્યાજદરમાં 25 બેસિસ પૉઈન્ટનો કાપ મૂકે તેવો આશાવાદ સેવી રહ્યા હોવાથી ડૉલર ઈન્ડેક્સમાં નરમાઈનું વલણ રહેતાં આગામી ટૂંકા સમયગાળા દરમિયાન ડૉલર સામે રૂપિયામાં સુધારાતરફી વલણ જળવાઈ રહે તેવી શક્યતા વ્યક્ત કરતાં મિરે એસેટ્ શૅરખાનના વિશ્લેષક અનુજ ચૌધરીએ જણાવ્યું હતું.
પ્રાપ્ત અહેવાલ અનુસાર આજે વિશ્વ બજારમાં ડૉલર ઈન્ડેક્સ ઘટ્યા મથાળેથી 0.16 ટકાના સુધારા સાથે 96.78 આસપાસ અને બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.66 ટકા ઘટીને બેરલદીઠ 68.02 ડૉલર આસપાસ ક્વૉટ થઈ રહ્યા હતા, જ્યારે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટી અનુક્રમે 313.02 પૉઈન્ટ અને 91.15 પૉઈન્ટ વધીને બંધ રહ્યા હતા. વધુમાં ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 308.32 કરોડની ચોખ્ખી લેવાલી રહી હોવાના નિર્દશ હોવાથી રૂપિયાના સુધારાને ટેકો મળ્યો હોવાનું સૂત્રોએ ઉમેર્યું હતું.
