(વાણિજ્ય પ્રતિનિધિ તરફથી)
નવી મુંબઈઃ સ્થાનિક જથ્થાબંધ ખાંડ બજારમાં આજે સપ્તાહના આરંભે સ્ટોકિસ્ટોની નવી લેવાલીનો અભાવ રહ્યો હતો. તેમ જ ખાસ કરીને સ્મોલ ગ્રેડની ખાંડમાં રિટેલ સ્તરની માગ નિરસ રહેતાં ભાવમાં ઉપલા મથાળેથી ક્વિન્ટલે રૂ. 10નો ઘટાડો આવ્યો હતો, જ્યારે મિડિયમ ગ્રેડની ખાંડમાં ટકેલું વલણ રહ્યું હતું. વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની માગને ટેકે ભાવ ટકેલા રહ્યાના અહેવાલ હતા.
પ્રાપ્ત અહેવાલ અનુસાર આજે સ્થાનિકમાં અંદાજે 28થી 29 ટ્રકની આવક સામે સ્ટોકિસ્ટોની નવી લેવાલીનો અભાવ અને રિટેલ સ્તરની માગ એકંદરે ખપપૂરતી રહેતાં ઉપાડ લગભગ 27થી 28 ટ્રકનો રહ્યો હતો. જોકે, આજે મુખ્યત્વે સ્મોલ ગ્રેડની ખાંડમાં રિટેલ સ્તરની માગ નિરસ રહેવાની સાથે અમુક માલની ગુણવત્તા પણ નબળી આવી હોવાથી તેનાં વેપાર ઉપલા મથાળેથી ક્વિન્ટલે રૂ. 10ના ઘટાડા સાથે રૂ. 3982થી 4050માં થયા હતા, જ્યારે મિડિયમ ગ્રેડની ખાંડમાં માગ અને માલની ગુણવત્તા જળવાઈ રહેતાં તેનાં વેપાર ક્વિન્ટલે રૂ. 4062થી 4142માં ટકેલા ધોરણે થયા હતા.
આ પણ વાંચો: સ્મોલ ગ્રેડની ખાંડમાં ધીમો સુધારો
વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની માગને ટેકે સ્મોલ ગ્રેડની ખાંડના વેપાર ક્વિન્ટલે રૂ. 3930થી 3970માં અને મિડિયમ ગ્રેડની ખાંડના વેપાર ક્વિન્ટલે રૂ. 3980થી 4020માં ગુણવત્તાનુસાર ટકેલા ધોરણે થયાના અહેવાલ હતા.
