(વાણિજ્ય પ્રતિનિધિ તરફથી)
નવી મુંબઈઃ સ્થાનિક જથ્થાબંધ ખાંડ બજારમાં આજે ખાસ કરીને મિડિયમ ગ્રેડની ખાંડમાં રિટેલ સ્તરની માગ પ્રબળ રહેવાની સાથે અમુક માલની ગુણવત્તા પણ સારી આવી હોવાથી ભાવમાં ઉપલા મથાળેથી ક્વિન્ટલે રૂ. 12નો સુધારો આવ્યો હતો, જ્યારે સ્મોલ ગ્રેડની ખાંડમાં ટકેલું વલણ રહ્યું હતું. વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની લેવાલીને ટેકે ભાવમાં ક્વિન્ટલે રૂ. 10નો સુધારો આવ્યો હતો.
બજારનાં સાધનોના જણાવ્યાનુસાર આજે સ્થાનિકમાં અંદાજે 29થી 30 ટ્રકની આવક સામે સ્ટોકિસ્ટોની છૂટીછવાઈ લેવાલી ઉપરાંત રિટેલ સ્તરની માગને ટેકે ઉપાડ લગભગ 27થી 28 ટ્રકનો રહ્યો હતો. જોકે, આજે સ્મોલ ગ્રેડની ખાંડમાં ખપપૂરતી માગ જળવાઈ રહેતાં ભાવ ક્વિન્ટલે રૂ. 3982થી 4060 આસપાસ ટકેલા રહ્યા હતા, જ્યારે મિડિયમ ગ્રેડમાં એકંદરે માગ પ્રબળ રહેવાની સાથે અમુક માલની ગુણવત્તા પણ સારી આવી હોવાથી તેના વેપાર ઉપલા મથાળેથી ક્વિન્ટલે રૂ. 12ના સુધારા સાથે રૂ. 4062થી 4142માં થયા હતા.
વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની આગામી નવરાત્રીના તહેવારોને અનુલક્ષીને માગ પ્રબળ રહેતાં ભાવમાં ક્વિન્ટલે રૂ. 10નો સુધારો આવ્યો હતો, જેમાં સ્મોલ ગ્રેડની ખાંડના વેપાર ક્વિન્ટલે રૂ. 3930થી 3960માં અને મિડિયમ ગ્રેડની ખાંડના વેપાર ક્વિન્ટલે રૂ. 3980થી 4010માં થયા હતા.
