(વાણિજ્ય પ્રતિનિધિ તરફથી)
મુંબઈઃ વૈશ્વિક સ્તરે કોપરમાં પુરવઠાખેંચની ભીતિ સર્જાવાની ભીતિ સાથે ભાવમાં મક્કમથી સુધારાતરફી વલણ જોવા મળી રહ્યું હોવા છતાં આજે સ્થાનિક જથ્થાબંધ ધાતુ બજારમાં સપ્તાહના અંતે વૈશ્વિક અહેવાલોની ગેરહાજરી વચ્ચે એકંદરે કામકાજો નિરસ રહેતાં કોપર યુટેન્સિલ્સ સ્ક્રેપ સિવાયની તમામ વેરાઈટીઓ તથા લીડ ઈન્ગોટ્સમાં સ્ટોકિસ્ટોની છૂટીછવાઈ વેચવાલી તેમ જ સાર્વત્રિક સ્તરેથી માગ નિરસ રહેતાં ભાવમાં કિલોદીઠ રૂ. એકથી પાંચનો ઘટાડો આવ્યો હતો, જ્યારે માત્ર ટીન અને નિકલમાં સ્ટોકિસ્ટોની છૂટીછવાઈ લેવાલી અને ઔદ્યોગિક વપરાશકારોની માગને ટેકે ભાવ અનુક્રમે કિલોદીઠ રૂ. સાત અને રૂ. ત્રણનો સુધારો જોવા મળ્યો હતો અને અન્ય તમામ ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે એકમાત્ર કોપર યુટેન્સિલ્સ સ્ક્રેપમાં છૂટીછવાઈ માગને ટેકે ભાવ કિલોદીઠ રૂ. 805ના મથાળે ટકેલા રહ્યા હતા. આ સિવાય કોપરની તમામ વેરાઈટીઓમાં નફારૂપી વેચવાલીનું દબાણ જળવાઈ રહેવાની સાથે વપરાશકાર ઉદ્યોગની માગ પણ ખપપૂરતી રહેતાં ભાવમાં ઘટાડાતરફી વલણ રહ્યું હતું જેમાં કોપર વાયરબારના ભાવ કિલોદીઠ રૂ. પાંચ ઘટીને રૂ. 975, કોપર આર્મિચરના ભાવ કિલોદીઠ રૂ. ચાર ઘટીને રૂ. 870, કોપર સ્ક્રેપ હેવીના ભાવ કિલોદીઠ રૂ. ત્રણ ઘટીને રૂ. 888 અને કોપર કેબલ સ્ક્રેપના ભાવ કિલોદીઠ રૂ. બે ઘટીને રૂ. 900ના મથાળે રહ્યા હતા. આ સિવાય આજે નિરસ માગે લીડ ઈન્ગોટ્સના ભાવ કિલોદીઠ રૂ. એક ઘટીને રૂ. 184ના મથાળે રહ્યા હતા.
જોકે, ટીન અને નિકલમાં સ્ટોકિસ્ટો તેમ જ વપરાશકાર ઉદ્યોગ અને સ્થાનિક ડીલરોની માગને ટેકે ભાવ અનુક્રમે કિલોદીઠ રૂ. સાત વધીને રૂ. 3147 અને રૂ. ત્રણ વધીને રૂ. 1355ના મથાળે રહ્યા હતા. આ સિવાયની અન્ય તમામ ધાતુઓ જેમ કે બ્રાસ, એલ્યુમિનિયમ અને ઝિન્ક સ્લેબમાં ખપપૂરતી માગ જળવાઈ રહેતાં ભાવ ટકેલા રહ્યાના અહેવાલ હતા.
