(વાણિજ્ય પ્રતિનિધિ તરફથી)
મુંબઈઃ લંડન મેટલ એક્સચેન્જ ખાતે આજે કોપર સહિતની ધાતુઓમાં મક્કમ વલણ જળવાઈ રહ્યું હોવા છતાં આજે સ્થાનિક જથ્થાબંધ ધાતુ બજારમાં એકંદરે કામકાજો પાંખાં રહ્યા હોવાથી વિવિધ ધાતુઓના ભાવમાં મિશ્ર વલણ જોવા મળ્યું હતું.
સૂત્રોના જણાવ્યાનુસાર આજે મુખ્યત્વે ટીનમાં સતત ત્રીજા સત્રમાં સ્ટોકિસ્ટોની વેચવાલીનું દબાણ રહેતાં ભાવમાં વધુ કિલોદીઠ રૂ. 15નો ઘટાડો આવ્યો હતો.
આ સિવાય નિરસ માગે એલ્યુમિનિયમ ઈન્ગોટ્સમાં કિલોદીઠ રૂ. બેનો અને કોપર કેબલ સ્ક્રેપ, કોપર સ્ક્રેપ હેવી તથા કોપર આર્મિચરમાં કિલોદીઠ રૂ. એકનો ઘટાડો આવ્યો હતો.
આપણ વાંચો: ટીનમાં સ્ટોકિસ્ટોની આક્રમક લેવાલીએ રૂ. 210નો ઉછાળો, અન્ય ધાતુઓમાં તેજીનું વલણ
જોકે, આજે સ્ટોકિસ્ટોની લેવાલીને ટેકે બ્રાસ શીટ કટિંગ્સ અને કોપર વાયરબારમાં કિલોદીઠ રૂ. પાંચનો અને કોપર યુટેન્સિલ્સ સ્ક્રેપમાં કિલોદીઠ રૂ. ત્રણનો સુધારો આવ્યો હતો તથા અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે મુખ્યત્વે ટીનમાં સતત ત્રીજા સત્રમાં સ્ટોકિસ્ટોની આક્રમક વેચવાલી રહેતાં ભાવ કિલોદીઠ રૂ. 15 ઘટીને રૂ. 3363ના મથાળે રહ્યા હતા.
વધુમાં આજે સાર્વત્રિક સ્તરેથી માગ નિરસ રહેતાં એલ્યુમિનિયમ ઈન્ગોટ્સના ભાવ કિલોદીઠ રૂ. બે ઘટીને રૂ. 263 અને કોપર કેબલ સ્ક્રેપ, કોપર સ્ક્રેપ હેવી તથા કોપર આર્મિચરના ભાવ કિલોદીઠ રૂ. એકના ઘટાડા સાથે અનુક્રમે રૂ. 947, રૂ. 933 અને રૂ. 919ના મથાળે રહ્યા હતા.
જોકે, આજે સ્ટોકિસ્ટોની લેવાલી ઉપરાંત વપરાશકાર ઉદ્યોગની માગને ટેકે બ્રાસ શીટ કટિંગ્સ અને કોપર વાયરબારના ભાવ કિલોદીઠ રૂ. પાંચ વધીને અનુક્રમે રૂ. 650 અને રૂ. 1025 તથા કોપર યુટેન્સિલ્સ સ્ક્રેપના ભાવ કિલોદીઠ રૂ. ત્રણ વધીને રૂ. 848ના મથાળે રહ્યા હતા. આ સિવાયની અન્ય તમામ ધાતુઓમાં છૂટીછવાઈ માગને ટેકે ભાવમાં ટકેલું વલણ રહ્યું હોવાનું સૂત્રોએ જણાવ્યું હતું.
