બજારમાં ગતિ આવશે: એક્ઝિટ પોલમાંથી સારું ટ્રીગર મળશે તો નિફ્ટી ૨૦,૨૦૦ની સપાટી બતાવશે

ફોરકાસ્ટ -નિલેશ વાઘેલા

શેરબજારમાં આ સપ્તાહ અનેક મહત્ત્વના પરિબળોથી પ્રભાવિત રહેવાનું છે. મેક્રો ઇકોનોમિક ડેટાની ઘોષણાઓમાં મુખ્ય ડ્રાઇવરો ત્રીજા-ક્વાર્ટરના જીડીપી આંકડાઓ, ઓટો સેલ્સ ડેટા, પીએમઆઇ ડેટા અને યુએસ જીડીપી ડેટા, ક્રૂડ ઓઇલ ઇન્વેન્ટરીઝ, યુએસ પીએમઆઇ ડેટા અને યુરોઝોન કોર સીપીઆઇ ડેટામાંથી ઉદ્ભવતા વૈશ્વિક પ્રવાહોને સમાવે છે. આ તત્વો આ સપ્તાહમાં શેરબજારના વલણોની દિશાને સામૂહિક રીતે પ્રભાવિત કરશે.

હાલ બજારને ખલેલ પહોંચાડી શકે એવા આંતરરાષ્ટ્રીય પરિબળો શાંત છે, ત્યારે બજારના સહભાગીઓ ક્રૂડ ઓઇલના ભાવ, યુએસ બોન્ડની ઉપજ અને ડોલર ઇન્ડેક્સની ગતિવિધિઓ પર નજર રાખશે. સૌથી મહત્ત્વી બાબતમાં એક્ઝિટ પોલ પર પણ ચાંપતી નજર રાખશે. દરમિયાન, સ્થાનિક મોરચે સૌથી મહત્વપૂર્ણ પરિબળોમાંનું એક ૩૦ નવેમ્બરે મિઝોરમ, મધ્યપ્રદેશ, છત્તીસગઢ, રાજસ્થાન અને તેલંગાણા નામના પાંચ રાજ્યો માટે બહુપ્રતીક્ષિત એક્ઝિટ પોલની આગાહી હશે, જે મતદાન પછી ૩૦ નવેમ્બરે સાંજે જાહેર કરવામાં આવશે. તેલંગાણામાં. અન્ય ચાર રાજ્યોમાં ગયા સપ્તાહે મતદાન પૂર્ણ થયું હતું. ગુરુ નાનક જયંતિ નિમિત્તે સોમવારે શેરબજારો બંધ રહેશે.

ગયા અઠવાડિયે, બીએસઇ બેન્ચમાર્કમાં ૧૭૫.૩૧ પોઈન્ટનો વધારો જોવા મળ્યો હતો, જે ૦.૨૬ ટકાની સમકક્ષ હતો, જ્યારે નિફ્ટી બેન્ચમાર્ક ૬૨.૯ પોઈન્ટ ઉછળ્યો હતો, જે ૦.૩૧ ટકાનો વધારો દર્શાવે છે. શુક્રવારે બજારનો સપ્તાહનો અંત પોઝિટીવ નોટ પર રહ્યો હતો. બજાર નિરીક્ષકો નવેમ્બરના માસિક ઓટો વેચાણના આંકડાઓની આગામી જાહેરાત પર નજીકથી નજર રાખશે, જે ડિસેમ્બરની શરૂઆતમાં અપેક્ષિત છે.

સ્થાનિક મેક્રો ઇકોનોમિક મોરચે, ત્રીજા ક્વાર્ટર (જુલાઈ-સપ્ટેમ્બર) માટે ભારતનું ગ્રોસ ડોમેસ્ટિક પ્રોડક્ટ (જીડીપી) ગુરૂવાર, ૩૦મી નવેમ્બરે રિલીઝ થશે. શુક્રવાર, ૧લી ડિસેમ્બરે, ઉત્પાદન ક્ષેત્ર માટે પરચેઝિંગ મેનેજર્સ ઇન્ડેક્સ (પીએમઆઇ) ડેટા જાહેર થવાનો છે.

ઓટો કંપનીઓ માસિક વેચાણ ડેટાના પ્રકાશન પહેલાના સપ્તાહમાં પણ ધ્યાન કેન્દ્રિત કરશે. બજાર યુએસ જીડીપી ડેટા, ક્રૂડ ઓઇલ ઇન્વેન્ટરીઝ, યુએસ પીએમઆઈ ડેટા અને યુરોઝોન કોર સીપીઆઈ ડેટા પરથી વધુ સંકેતો લેશે.

યુએસ બોન્ડ યીલ્ડમાં તીવ્ર ઘટાડો થયો હોવાને કારણે વિદેશી સંસ્થાકીય રોકાણકારો (એફઆઇઆઇ)ને તેમની વેચવાલી ધીમી કરવાની ફરજ પડી છે. મહત્ત્વની વાત એ છે કે, તેઓ શુક્રવારે રૂ. ૨,૬૨૫ કરોડની મોટી ખરીદી સાથે આ મહિનામાં ચાર દિવસે ખરીદદાર રહ્યાં હતા.

બજારના સાધનો અનુસાર કોઈ મોટા વૈશ્ર્વિક અને સ્થાનિક સંકેતોની ગેરહાજરીને કારણે ૨૪ નવેમ્બરના રોજ પૂરા થયેલા સપ્તાહમાં બજારનું નિરાશાજનક સપ્તાહ રહ્યું હતું, છતાં મહત્ત્વની બાબત એ છે કે, સતત ચોથા સપ્તાાહે તે ઊંચા સ્તરે સમાપ્ત થયું હતું. આ સપ્તાહ સમાચારોથી ભરપૂર હશે, જેમાં પાંચ રાજ્યોની ચૂંટણીઓ પછીના એક્ઝિટ પોલ, સપ્ટેમ્બર ક્વાર્ટરની આર્થિક વૃદ્ધિ અને યુએસ જીડીપી ડેટા માટેના બીજા અંદાજોનો સમાવેશ રહેશે અને રોકાણકારો તેના પર ચાંપતી નજર રાખશે.

એકંદરે, અગાઉના સાત ટ્રેડિંગ સત્રોમાં જોવા મળેલા રેન્જબાઉન્ડ ટ્રેડ પછી, કેટલાક વૈશ્ર્વિક અને સ્થાનિક પરિબળોના સંકેતો લઈને બજાર થોડી ગતિમાં આવવાની શક્યતા છે, જોકે માસિક ડેરિવેટિવ કોન્ટ્રાક્ટની સમાપ્તિને કારણે થોડી અસ્થિરતા જોવા મળી શકે છે, એમ નિષ્ણાતોએ જણાવ્યું હતું.

વ્યાપક બજારોમાં મિશ્ર વલણ જોવા મળ્યું હતું, કારણ કે નિફ્ટી મિડકેપ-૧૦૦ ઇન્ડેક્સ ૦.૬ ટકા વધ્યો હતો અને નિફ્ટી સ્મોલકેપ ૧૦૦ ઇન્ડેક્સ ૦.૪ ટકા નીચે હતો. એક્ઝિટ પોલ અને મેક્રો નંબર્સ ઉપરાંત, બજારના સહભાગીઓ ક્રૂડ ઓઈલના ભાવ, યુએસ બોન્ડ યીલ્ડ અને ડોલર ઈન્ડેક્સમાં પણ હલચલ પર નજીકથી નજર રાખશે.
દરમિયાન, પાછલા સપ્તાહે મૂડીબજારમાં જોરદાર હલચલ જોવા મળી હતી. પ્રાઇમરી માર્કેટમાં ૨૨ નવેમ્બરના રોજ, બુધવારે એકસાથે પ્રવેશેલા ચારે જાહેર ભરણાંને જબરદસ્ત પ્રતિસાદ સાંપડ્યો છે. ટાટા ટેકનોલોજીના સંદર્ભે તો એપ્લિકેશનમાં વિક્રમ સર્જાયો છે. નોંધવાની વાત એ છે કે, એક જ દિવસે ચાર ભરણાં પ્રવેશ્યા હોવા છતાં રિટેલ ઇન્વેસ્ટર્સનો ચારે ભરણા માટે સારો ઉત્સાહ જોવા મળ્યો છે.
મૂડીબજારમાં પ્રવેશેલા ટાટા ટેકનોલોજીસ લિમિટેડનું ભરણું ૨૪ નવમેબરે સાંજે પાંચ વાગ્યા સુધીમાં કુલ ૬૯.૪૩ ગણું ભરાયું છે. નોંધવા જેવી બાબત એ છે કે, આ ભરણાંને ૭૩,૫૮,૧૫૯ બિડ મળી છે. બીજા દિવસે આ ભરણા માટે ૫૦ લાખથી વધુ અરજી મળી હતી. ખાનગી કંપનીઓ માટે આ એક રેકોર્ડ છે કારણ કે બીજા મોટાભાગના સફળ આઇપીઓમાં ત્રીજા દિવસ સાથે ૩૦ લાખથી વધુ અરજી મળી હતી.
એલઆઇસીને ૭૩.૩૮ લાખ અરજી મળી હતી. રિલાયન્સ પાવરને ૪૮ લાખ, ગ્લેનમાર્ક લાઇફને ૩૯.૫ લાખ અરજી મળી હતી. જ્યારે એસબીઆઇ લાઇફને ૩૯.૦૪ લાખ અરજી મળી હતી. દરમિયાન ટાટા ટેકનોલોજીમાં ક્વિબ્સ પોર્શન ૨૦૩.૪૧ ગણો, નોન ઇન્સ્ટિટ્યુશનલ પોર્શન ૬૨.૧૧ ગણો અને રિટેલ પોર્શન ૧૬.૪૯ ગણો સબ્સ્ક્રાઇબ થયો છે. પ્રાઇસ બેન્ડ રૂ. ૪૭૫-૫૦૦ હતી.

જ્યારે, ગાંધાર ઓઇલ રિફાઇનરી ઇન્ડિયાનું ભરણું કુલ ૬૫.૬૨ ગણું ભરાયું છે. નોન ઇન્સ્ટિટ્યુશનલ પોર્શન ૬૪.૩૪ ગણો અને રિટેલ પોર્શન ૨૯.૯૨ ગણો સબ્સ્ક્રાઇબ થયો છે. પ્રાઇસ બેન્ડ રૂ. ૧૬૦-૧૬૯ હતી. જ્યારે ફ્લેર રાઇટિંગ ઇન્ડસ્ટ્રીઝ લિમિટેડની ઇનિશિયલ પબ્લિક ઓફરનું ભરણું કુલ ૪૯.૨૭ ગણું ભરાયું છે. નોન ઇન્સ્ટિટ્યુશનલ પોર્શન ૩૫.૨૩ ગણો અને રિટેલ પોર્શન ૧૩.૭૩ ગણો સબ્સ્ક્રાઇબ થયો છે. પ્રાઇસ બેન્ડ રૂ. ૨૮૮-૩૦૪ હતી.
એ જ રીતે, ફેડબેન્ક ફાઇનાન્શિયલ સર્વિસિસનું ભરણું કુલ ૨.૨૪ ગણું ભરાયું છે. નોન ઇન્સ્ટિટ્યુશનલ પોર્શન ૧.૪૯ ગણો અને રિટેલ પોર્શન ૧.૮૮ ગણો સબ્સ્ક્રાઇબ થયો છે. પ્રાઇસ બેન્ડ રૂ. ૧૩૩-૧૪૦ હતી.