(વાણિજ્ય પ્રતિનિધિ તરફથી)
મુંબઈઃ સ્થાનિક જથ્થાબંધ ધાતુ બજારમાં આજે સપ્તાહના અંત અને વૈશ્વિક અહેવાલોની ગેરહાજરી વચ્ચે માગ અનુસાર વિવિધ ધાતુઓમાં મિશ્ર વલણ જોવા મળ્યું હતું. બજારનાં સાધનોના જણાવ્યાનુસાર આજે મુખ્યત્વે નિકલમાં સ્ટોકિસ્ટોની લેવાલીને ટેકે ભાવ કિલોદીઠ રૂ. આઠ વધી આવ્યા હતા અને વપરાશકાર ઉદ્યોગની છૂટીછવાઈ માગને ટેકે કોપર વાયરબાર અને લીડ ઈન્ગોટ્સમાં રૂ. બેનો સુધારો આવ્યો હતો, જ્યારે ઝિન્ક સ્લેબ અને ટીનમાં સ્ટોકિસ્ટોની છૂટીછવાઈ વેચવાલી તેમ જ સાર્વત્રિક સ્તરેથી માગ નિરસ રહેતાં ભાવમાં અનુક્રમે કિલોદીઠ રૂ. બે અને રૂ. ત્રણનો ઘટાડો આવ્યો હતો તેમ જ અન્ય તમામ ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે એકમાત્ર નિકલમાં સતત બીજા સત્રમાં સ્ટોકિસ્ટોની લેવાલી ઉપરાંત સાર્વત્રિક સ્તરેથી માગ જળવાઈ રહેતાં ભાવ કિલોદીઠ રૂ. આઠ વધીને રૂ. 1360ના મથાળે રહ્યા હતા. આ સિવાય વપરાશકાર ઉદ્યોગ તથા સ્થાનિક ડીલરોની લેવાલીને ટેકે કોપર વાયરબાર તથા લીડ ઈન્ગોટ્સના ભાવ કિલોદીઠ રૂ .બે વધીને અનુક્રમે રૂ. 951 અને રૂ. 184ના મથાળે રહ્યા હતા.
આ પણ વાંચો: ધાતુમાં પાંખાં કામકાજે મિશ્ર વલણ
જોકે, આજે સ્ટોકિસ્ટોની છૂટીછવાઈ વેચવાલીના દબાણ ઉપરાંત વપરાશકાર ઉદ્યોગની લેવાલી પણ નિરસ રહેતાં ટીનના ભાવ કિલોદીઠ રૂ. ત્રણ ઘટીને રૂ. 3103 અને ઝિન્ક સ્લેબના ભાવ કિલોદીઠ રૂ. બે ઘટીને રૂ. 278ના મથાળે રહ્યા હતા. આ સિવાયની અન્ય તમામ ધાતુઓમાં ટકેલું વલણ રહ્યું હતું જેમાં કિલોદીઠ કોપર કેબલ સ્ક્રેપના ભાવ રૂ. 874, કોપર સ્ક્રેપ હેવીના રૂ. 861, કોપર આર્મિચરના રૂ. 847, કોપર યુટેન્સિલ્સ સ્ક્રેપના રૂ. 777, બ્રાસ શીટ કટિંગ્સના રૂ. 620, બ્રાસ યુટેન્સિલ્સ સ્ક્રેપના રૂ.578, એલ્યુમિનિયમ યુટેન્સિલ્સ સ્ક્રેપના રૂ. 217 અને એલ્યુમિનિયમ ઈન્ગોટસના રૂ. 252ના મથાળે રહ્યા હોવાનું સૂત્રોએ જણાવ્યું હતું.
