ક્રૂડતેલના ભાવ વધી આવતા ડૉલર સામે રૂપિયામાં બાવીસ પૈસાનો સુધારો ધોવાઈને અંતે એક પૈસો નરમ

(વાણિજ્ય પ્રતિનિધિ તરફથી)

મુંબઈઃ સ્થાનિક ઈક્વિટી માર્કેટમાં સુધારાતરફી વલણ અને ગત શુક્રવારે વિદેશી સંસ્થાકીય રોકાણકારોની ઈક્વિટીમાં જોવા મળેલી લેવાલી ઉપરાંત આજે વિશ્વ બજારમાં ડૉલર ઈન્ડેક્સમાં નરમાઈનું વલણ રહેતાં સ્થાનિક ફોરેક્સ માર્કેટમાં આજે એક તબક્કે ડૉલર સામે રૂપિયો બાવીસ પૈસા ઊંચકાઈ ગયો હતો, પરંતુ ત્યાર બાદ બે્રન્ટ ક્રૂડતેલના વાયદામાં જોવા મળેલા સુધારા ઉપરાંત અમેરિકા-ભારત વચ્ચેની ટ્રેડ ડીલમાં થઈ રહેલા વિલંબની ચિંતા સપાટી પર આવતા સત્ર દરમિયાન જોવા મળેલો સુધારો ધોવાઈ ગયો હતો અને અંતે રૂપિયો એક પૈસાના ઘટાડા સાથે 89.68ની સપાટીએ બંધ રહ્યો હતો.

બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગત શુક્રવારના 89.67ના બંધ સામે સુધારાના અન્ડરટોને 89.53ની સપાટીએ ખૂલ્યા બાદ ઉપરમાં 89.45 અને નીચામાં 89.75 સુધી ગબડ્યા બાદ અંતે આગલા બંધ સામે એક પૈસાના ઘટાડા સાથે 89.68ના મથાળે બંધ રહ્યો હતો.

તાજેતરમાં ડૉલર ઈન્ડેક્સમાં જોવા મળી રહેલી નરમાઈ અને સ્થાનિક ઈક્વિટી માર્કેટમાં સુધારો જોવા મળી રહ્યો હોવાથી આગામી ટૂંકા સમયગાળામાં ડૉલર સામે રૂપિયામાં સુધારાતરફી વલણ જોવા મળે તેવી શક્યતા નકારી ન શકાય, એમ મિરે એસેટ્ શૅરખાનના વિશ્લેષક અનુજ ચૌધરીએ જણાવ્યું હતું. જોકે, અમેરિકા સાથેની ટ્રેડ ડીલમાં થઈ રહેલો વિલંબ શક્યતઃ રૂપિયાને દબાણ હેઠળ રાખે તેમ છતાં અમારા મતે રૂપિયો 89.20થી 89.80ની રેન્જમાં અથડાતો રહેશે, એમ તેમણે ઉમેર્યું હતું.

દરમિયાન આજે વિશ્વ બજારમાં ડૉલર ઈન્ડેક્સ આગલા બંધ સામે 0.08 ટકા ઘટીને 98.52 આસપાસ ક્વૉટ થઈ રહ્યો હતો, જ્યારે બે્રન્ટ ક્રૂડતેલના વાયદામાં ભાવ આગલા બંધ સામે 0.86 ટકા વધીને બેરલદીઠ 61 ડૉલર આસપાસ ક્વૉટ થઈ રહ્યા હતા. જ્યારે સ્થાનિક સ્તરે બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટી અનુક્રમે 638.12 પૉઈન્ટ અને 206 પૉઈન્ટ વધીને બંધ રહ્યા હતા. તેમ જ ગત શુક્રવારે વિદેશી સંસ્થાકીય રોકાણકારોની ઈક્વિટીમાં રૂ. 1830.89 કરોડની ચોખ્ખી લેવાલી રહી હોવાથી રૂપિયામાં ઘટાડો મર્યાદિત રહ્યો હોવાનું સૂત્રોએ જણાવ્યું હતું.