(વાણિજ્ય પ્રતિનિધિ તરફથી)
મુંબઈઃ વૈશ્વિક બજારમાં આજે ડૉલર ઈન્ડેક્સ તેમ જ બે્રન્ટ ક્રૂડતેલના વાયદામાં આગેકૂચ તેમ જ ભારતથી અમેરિકા ખાતે થતી નિકાસમાં અમેરિકા ટૅરિફમાં વધારો કરે તેવી ભીતિ હેઠળ સ્થાનિક ઈક્વિટી માર્કેટમાં ગાબડાં અને વિદેશી સંસ્થાકીય રોકાણકારોની ઈક્વિટીમાં વેચવાલીનું દબાણ જળવાઈ રહ્યું હોવાથી આજે સ્થાનિક ફોરેક્સ માર્કેટમાં ડૉલર સામે રૂપિયો દબાણ હેઠળ રહેતાં ત્રણ પૈસા નબળો પડીને 89.90ની સપાટીએ બંધ રહ્યો હોવાનું સ્થાનિક ટ્રેડરોએ જણાવ્યું હતું.
આજે સ્થાનિકમાં ડૉલર સામે રૂપિયો ગઈકાલના 89.92ના બંધ સામે સાધારણ નરમાઈના અન્ડરટોને 89.96ની સપાટીએ ખૂલ્યા બાદ સત્ર દરમિયાન નીચામાં 90.14 અને ઉપરમાં 89.73ની રેન્જમાં અથડાઈને અંતે ત્રણ પૈસાના ઘટાડા સાથે 89.90ના મથાળે બંધ રહ્યો હતો.
આપણ વાચો: રિઝર્વ બૅન્કના સંભવિત હસ્તક્ષેપે ડૉલર સામે રૂપિયો 27 પૈસા ઊંચકાયો
હાલના તબક્કે ભારત અમેરિકા તરફથી ટૅરિફ વૃદ્ધિનાં ભયનો સામનો કરી રહ્યું છે અને જે અમેરિકા ટૅરિફમાં 10 બેસિસ પૉઈન્ટનો પણ વધારો કરે તો પાઈપલાઈનમાં રહેલી ટ્રેડ ડીલનો કોઈ અર્થ નહીં રહે, એમ ફિનરેક્સ ટ્રેઝરી એડ્વાઈઝરીનાં ટ્રેઝરી હેડ અને એક્ઝિક્યુટીવ ડિરેક્ટર અનિલ કુમાર ભણસાળીએ જણાવતાં ઉમેર્યું હતું કે આજે રિઝર્વ બૅન્કની ડૉલરમાં વેચવાલી રહેતાં રૂપિયામાં મર્યાદિત ઘટાડો જોવા મળ્યો હતો. જોકે, વર્તમાન સ્થિતિને ધ્યાનમાં લેતા આગામી ટૂંકા સમયગાળા દરમિયાન ડૉલર સામે રૂપિયો 89.80થી 90.30ની રેન્જમાં રહે તેવી શક્યતા જણાય છે.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.02 ટકા વધીને 98.70 આસપાસ અને બે્રન્ટ ક્રૂડતેલના વાયદામાં ભાવ 0.85 ટકા વધીને બેરલદીઠ 60.47 ડૉલર આસપાસ ક્વૉટ થઈ રહ્યા હતા, જ્યારે સ્થાનિક સ્તરે બીએસઈ બૅન્ચમાર્ક સેન્સેક્સ 780.18 પૉઈન્ટના અને એનએસઈ બૅન્ચમાર્ક નિફ્ટી 263.90 પૉઈન્ટના ઘટાડા સાથે બંધ રહ્યો હોવાથી તેમ જ ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 1527.71 કરોડની ચોખ્ખી વેચવાલી રહેતાં રૂપિયો નબળો પડ્યો હોવાનું સૂત્રોએ જણાવ્યું હતું.
