(વાણિજ્ય પ્રતિનિધિ તરફથી)
મુંબઈઃ વૈશ્વિક બજારમાં ડૉલર ઈન્ડેક્સ અને બે્રન્ટ ક્રૂડતેલના વાયદામાં સુધારાતરફી વલણ, સ્થાનિક ઈક્વિટી માર્કેટમાં નરમાઈ અને વિદેશી સંસ્થાકીય રોકાણકારોની અવિરત વેચવાલીનું દબાણ રહેતાં આજે સ્થાનિક ફોરેક્સ માર્કેટમાં ડૉલર સામે રૂપિયો છ પૈસા નબળો પડીને 90.23ની સપાટીએ બંધ રહ્યો હતો.
આજે સ્થાનિકમાં ડૉલર સામે રૂપિયો ગઈકાલના 90.17ના બંધ સામે નરમાઈના અન્ડરટોને 90.24ની સપાટીએ ખૂલ્યા બાદ સત્ર દરમિયાન નીચામાં 90.30 અને ઉપરમાં 90.18ની રેન્જમાં અથડાઈને અંતે ગઈકાલના બંધ સામે છ પૈસા ઘટીને 90.23ની સપાટીએ બંધ રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયામાં એક પૈસાનો સુધારો જોવા મળ્યો હતો.
આ પણ વાંચો : ડૉલર સામે રૂપિયો 11 પૈસા ગબડ્યો
હાલમાં વૈશ્વિક સ્તરે પ્રવર્તી રહેલા ભૂરાજકીય તણાવ અને ક્રૂડતેલના ભાવમાં થઈ રહેલો વધારો, ઈક્વિટી માર્કેટમાં નરમાઈ અને વિદેશી સંસ્થાકીય રોકાણકારોની અવિરત વેચવાલી રૂપિયાને વધુ દબાણ હેઠળ રાખે છે. જોકે, અમેરિકા ભારત વચ્ચે ટ્રેડ ડીલ થવાનો આશાવાદ અને ગત સપ્તાહે અમેરિકાનાં રોજગારીના ડેટા નબળા આવ્યા હોવાથી ફેડરલ રિઝર્વ દ્વારા રેટ કટ કરવામાં આવે તેવો આશાવાદ પ્રબળ બનવાની સાથે રિઝર્વ બૅન્કનો સંભવીત હસ્તક્ષેપ રૂપિયાને અમુક અંશે ટેકો આપે છે, એમ મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે અમારા મતે આગામી ટૂંકા સમયગાળા દરમિયાન ડૉલર સામે રૂપિયાની રેન્જ 90.10થી 90.70 આસપાસની જોવા મળે તેવી શક્યતા છે.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.07 ટકા વધીને 98.69 આસપાસ અને બે્રન્ટ ક્રૂડતેલના વાયદામાં ભાવ 1.47 ટકા વધીને બેરલદીઠ 64.80 ડૉલર આસપાસ ક્વૉટ થઈ રહ્યા હતા, જ્યારે સ્થાનિકમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટી અનુક્રમે 250.48 પૉઈન્ટ અને 57.95 પૉઈન્ટ ઘટીને બંધ રહ્યા હોવાથી તેમ જ ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 3638.40 કરોડની ચોખ્ખી વેચવાલી રહી હોવાથી રૂપિયો વધુ દબાણ હેઠળ આવ્યો હોવાનું સૂત્રોએ જણાવ્યું હતું.
