મુંબઈઃ ગત 21મી નવેમ્બરના રોજ પૂરા થયેલા સપ્તાહે ખાસ કરીને સોનાની અનામતમાં ઘટાડો થવાથી દેશની કુલ વિદેશી હૂંડિયામણની અનામત 4.472 અબજ ડૉલર ઘટીને 688.108 અબજ ડૉલરની સપાટીએ રહી હોવાનું રિઝર્વ બૅન્ક ઑફ ઈન્ડિયાએ સાપ્તાહિક આંકડાકીય માહિતીમાં જણાવ્યું છે. નોંધનીય બાબત એ છે કે આ પૂર્વેના સપ્તાહે અનામત 5.543 અબજ ડૉલરના વધારા સાથે 692.576 અબજ ડૉલરની સપાટીએ રહી હતી.
દરમિયાન સમીક્ષા હેઠળના સપ્તાહમાં દેશની કુલ અનામતમાં સૌથી વધુ હિસ્સો ધરાવતી વિદેશી ચલણી અસ્ક્યામતો 1.69 અબજ ડૉલર ઘટીને 560.6 અબજ ડૉલરની સપાટીએ રહી હતી. નોંધનીય બાબત એ છે કે વિદેશી ચલણી અસ્ક્યામતોમાં ડૉલર ઉપરાંત યુરો, પાઉન્ડ અને યેન જેવાં અન્ય મુખ્ય ચલણો સામે સપ્તાહ દરમિયાન રૂપિયામાં થયેલી વધઘટને પણ ધ્યાનમાં લેવામાં આવતી હોય છે.
આ પણ વાંચો: વિદેશી હૂંડિયામણની અનામતમાં 5.54 અબજનો ઉછાળો
વધુમાં સપ્તાહ દરમિયાન સોનાની અનામત પણ 2.675 અબજ ડૉલરના ઘટાડા સાથે 104.182 અબજ ડૉલરના સ્તરે, ઈન્ટરનેશનલ મોનેટરી ફંડ સાથેના સ્પેશિયલ ડ્રોઈંગ રાઈટ્સ 8.4 કરોડ ડૉલર ઘટીને 18.566 અબજ ડૉલર અને ઈન્ટરનેશનલ મોનેટરી ફંડ સાથેની અનામત 2.3 કરોડ ડૉલર ઘટીને 4.757 અબજ ડૉલરની સપાટીએ રહી હોવાનું રિઝર્વ બૅન્કે આંકડાકીય માહિતીમાં ઉમેર્યું હતું.
