(વાણિજ્ય પ્રતિનિધિ તરફથી)
મુંબઈઃ શિકાગો ખાતે ગઈકાલે સોયાતેલના વાયદામાં 145 સેન્ટનો ઘટાડો આવ્યાના ઓવરનાઈટ અહેવાલ તેમ જ આજે મલયેશિયાના બુર્સા મલયેશિયા ડેરિવેટીવ્સ એક્સચેન્જ ખાતે ક્રૂડ પામતેલના વાયદામાં 41 રિંગિટ ઘટી આવ્યાના અહેવાલને ધ્યાનમાં લેતા આજે સ્થાનિક જથ્થાબંધ ખાદ્યતેલ બજારમાં પણ આયાતી તેલમાં પીછેહઠ જળવાઈ રહેતાં 10 કિલોદીઠ આરબીડી પામોલિનમાં રૂ. 10 અને સોયા તથા સન રિફાઈન્ડમાં રૂ. પાંચનો ઘટાડો આવ્યો હતો. વધુમાં આજે ગુજરાતના મથકો પર સિંગતેલમાં તેલિયા ટીનના ભાવમાં 15 કિલોદીઠ રૂ. 25 અને લૂઝમાં 10 કિલોદીઠ રૂ. 15 ઘટી આવ્યા હોવાથી સ્થાનિકમાં પણ સિંગતેલના ભાવમાં રૂ. 10નો અને કપાસિયા રિફાઈન્ડમાં રૂ. પાંચનો ઘટાડો આવ્યો હતો, જ્યારે એકમાત્ર સરસવમાં મથકો પાછળ રૂ. પાંચનો સુધારો આવ્યો હતો. જોકે, ભાવઘટાડાના માહોલમાં હાજર, ડાયરેક્ટ ડિલિવરી તેમ જ સેલરિસેલ ધોરણે કામકાજો પાંખાં રહ્યા હતા.
આજે સ્થાનિકમાં ડાયરેક્ટ ડિલિવરી શરતે 10 કિલોદીઠ ગોલ્ડન એગ્રોનાં આરબીડી પામોલિનના રૂ. 1260, અલાનાના આરબીડી પામોલિનના રૂ. 1285, એવીઆઈના સોયા રિફાઈન્ડના રૂ. 1255, ઈમામીના આરબીડી પામોલિન તથા સોયા રિફાઈન્ડના રૂ. 1260, એડબ્લ્યુએલના આરબીડી પામોલિન અને સોયા રિફાઈન્ડના રૂ. 1260 અને સનફ્લાવર રિફાઈન્ડના રૂ. 1425 તથા પતંજલિ ફૂડ્સના આરબીડી પામોલિનના રૂ. 1280, સોયા રિફાઈન્ડના રૂ. 1285 અને સન રિફાઈન્ડના રૂ. 1410 ક્વૉટ થઈ રહ્યા હતા.
આજે ગુજરાતમાં ગોંડલ મથકે 31,000 ગૂણી મગફળીની આવક સામે વેપાર મણદીઠ રૂ. 950થી 1250માં થયા હતા, જ્યારે રાજકોટ મથકે 13,000 ગૂણી મગફળીની આવક સામે વેપાર મણદીઠ રૂ. 950થી 1300માં થયાના અહેવાલ હતા.
સ્થાનિકમાં આજે હાજરમાં વિવિધ દેશી-આયાતી ખાદ્યતેલના 10 કિલોદીઠ ભાવમાં આરબીડી પામોલિનના રૂ. 1285, સોયા રિફાઈન્ડના રૂ. 1290, સન રિફાઈન્ડના રૂ. 1420, સિંગતેલના રૂ. 1340, કપાસિયા રિફાઈન્ડના રૂ. 1355 અને સરસવના રૂ. 1605ના મથાળે રહ્યા હતા. આ સિવાય આજે ગુજરાતનાં મથકો પર નિરસ માગે સિંગતેલમાં તેલિયા ટીનના વેપાર 15 કિલોદીઠ રૂ. 20 ઘટીને રૂ. 2120માં અને લૂઝમાં 10 કિલોદીઠ 15 ઘટીને રૂ. 1315માં થયા હોવાનું સૂત્રોએ જણાવ્યું હતું.
