(વાણિજ્ય પ્રતિનિધિ તરફથી)
મુંબઈઃ ગુજરાતનાં મથકો પર આજે ખાસ કરીને સિંગતેલમાં સ્થાનિક, દેશાવરો તથા સ્ટોકિસ્ટોની આક્રમક લેવાલી રહેતાં તેલિયા ટીનના ભાવમાં 15 કિલોદીઠ રૂ. 190નો અને લૂઝમાં 10 કિલોદીઠ રૂ. 135નો ઉછાળો આવ્યાના પ્રોત્સાહક અહેવાલ સાથે સ્થાનિક જથ્થાબંધ ખાદ્યતેલ બજારમાં પણ સિંગતેલના ભાવમાં 10 કિલોદીઠ રૂ. 130નો ઝડપી ઉછાળો આવ્યો હતો. આ સિવાય આજે મથકો પાછળ 10 કિલોદીઠ કપાસિયા રિફાઈન્ડમાં રૂ. 20નો સુધારો આવ્યો હતો, જ્યારે સરસવ તેલમાં રૂ. 15 ઘટી આવ્યા હતા.
વધુમાં આજે મલયેશિયાના બુર્સા મલયેશિયા ડેરિવેટીવ્સ એક્સચેન્જ ખાતે ક્રૂડ પામતેલના વાયદામાં 88 રિંગિટ ઘટી આવ્યાના નિર્દેશો સાથે સ્થાનિકમાં આરબીડી પામોલિનમાં 10 કિલોદીઠ રૂ. 10 ઘટી આવ્યા હતા. જોકે, આજે એકંદરે બજારમાં મિશ્ર વલણ રહેતાં હાજર, ડાયરેક્ટ ડિલિવરી અને સેલરિસેલ ધોરણે છૂટાછવાયા વેપાર ગોઠવાયા હોવાનું સૂત્રોએ જણાવ્યું હતું.
દરમિયાન આજે કાર્ગો સર્વેયર ઈન્ટરટેક સર્વિસીસ દ્વારા જાહેર કરવામાં આવેલી પ્રાથમિક આંકડાકીય માહિતી અનુસાર જાન્યુઆરીમાં મલયેશિયાની પામતેલની નિકાસ આગલા ડિસેમ્બર મહિનાના 12,40,587 ટન સામે 17.93 ટકા વધીને 14,63,069 ટનની સપાટીએ રહી હોવાનું એક યાદીમાં જણાવ્યું હતું.
આપણ વાચો: ગુજરાતના મથકો પાછળ સિંગતેલમાં રૂ. 30નો ચમકારો, આયાતી તેલમાં સુધારો
આજે સ્થાનિકમાં ડાયરેક્ટ ડિલિવરી શરતે 10 કિલોદીઠ પતંજલિ ફૂડ્સના આરબીડી પામોલિન અને સોયા રિફાઈન્ડના માર્ચ ડિલિવરી શરતે ભાવ અનુક્રમે રૂ. 1330 અને રૂ. 1390 તથા સન રિફાઈન્ડના રૂ. 1635, ઈમામીના આરબીડી પામોલિનના રૂ. 1330 અને સોયા રિફાઈન્ડના રૂ. 1380, એડબ્લ્યુએલના આરબીડી પામોલિનના રૂ. 1325, સોયા રિફાઈન્ડના રૂ. 1380 અને સન રિફાઈન્ડના રૂ. 1655, ગોકુલ એગ્રોના આરબીડી પામોલિનના રૂ. 1330 અને સોયા રિફાઈન્ડના રૂ. 1368 તથા ગોલ્ડન એગ્રીના આરબીડી પામોલિનના રૂ. 1335 ક્વૉટ થઈ રહ્યા હતા. તેમ જ છૂટાછવાયા વેપારો પણ ગોઠવાયાના અહેવાલ હતા.
વધુમાં આજે ગુજરાતમાં ગોંડલ મથકે મગફળીની 25,000 ગૂણીની આવક ઉપરાંત ગઈકાલની શેષ 15,000 ગૂણી સહિત કુલ 40,000 ગૂણીના કામકાજો મણદીઠ રૂ. 1450થી 1650માં થયા હતા, જ્યારે રાજકોટ મથકે મગફળીની નવી કોઈ આવક નહોતી, પરંતુ ગઈકાલની શેષ 40,000 ગૂણીના વેપાર મણદીઠ રૂ. 1450થી 16500માં થયા હતા. તેમ જ આજે ગુજરાતના મથકો પર સિંગતેલમાં તેલિયા ટીનના વેપાર 15 કિલોદીઠ રૂ. 190 વધીને રૂ. 2840માં અને લૂઝમાં 10 કિલોદીઠ રૂ. 135 વધીને રૂ. 1810માં થયા હતા.
આજે હાજરમાં વિવિધ દેશી-આયાતી ખાદ્યતેલના 10 કિલોદીઠ ભાવમાં આરબીડી પામોલિનના રૂ. 1330, સોયા રિફાઈન્ડના રૂ. 1410, સન રિફાઈન્ડના રૂ. 1630, સિંગતેલના રૂ. 1820, કપાસિયા રિફાઈન્ડના રૂ. 1400 અને સરસવના રૂ. 1535ના મથાળે રહ્યા હતા.
