(વાણિજ્ય પ્રતિનિધિ તરફથી)
મુંબઈઃ અમેરિકી ફેડરલ રિઝર્વે ગઈકાલે બે દિવસીય બેઠકના અંતે વ્યાજદરમાં બજારની અપેક્ષાનુસાર 25 બેસિસ પૉઈન્ટનો કાપ મૂક્યો હોવા છતાં ફેડરલના અધ્યક્ષ જૅરૉમ પૉવૅલે આગામી ડિસેમ્બર મહિનામાં રેટ કટ અંગે અનિશ્ચિતતા વ્યક્ત કરી હોવાથી સ્થાનિક ઈક્વિટી માર્કેટમાં આજે બોલાયેલા કડાકા ઉપરાંત ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 2540 કરોડની ચોખ્ખી વેચવાલી રહી હોવાના નિર્દેશ તેમ જ માસાન્તને કારણે ડૉલરમાં ઑઈલ માર્કેટિંગ કંપનીઓની વ્યાપક લેવાલી રહેતા આજે સ્થાનિક ફોરેક્સ માર્કેટમાં ડૉલર સામે રૂપિયો 47 પૈસા ખાબકીને 88.69ની સપાટીએ બંધ રહ્યો હતો. જોકે, આજે વિશ્વ બજારમાં બે્રન્ટ ક્રૂડતેલના વાયદામાં તેમ જ ડૉલર ઈન્ડેક્સમાં નરમાઈ રહી હોવાથી રૂપિયાને અમુક અંશે ટેકો મળ્યો હોવાનું ફોરેક્સ ટ્રેડરોએ જણાવ્યું હતું.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.22ના બંધ સામે નરમાઈના અન્ડરટોને 88.37ની સપાટીએ ખૂલ્યા બાદ સત્ર દરમિયાન નીચામાં 88.75 અને ઉપરમાં 88.37ની રેન્જમાં રહ્યા બાદ અંતે ગઈકાલના બંધ સામે 47 પૈસાના કડાકા સાથે 88.69ના મથાળે બંધ રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયામાં સાત પૈસાનો સુધારો જોવા મળ્યો હતો.
ફેડરલ દ્વારા વ્યાજદરમાં વધુ કપાતની શક્યતા નબળી પડતાં ડૉલર ઈન્ડેક્સમાં મજબૂત વલણ રહે તેવી શક્યતા તેમ જ આવતીકાલે પણ ડૉલરમાં આયાતકારોની લેવાલી જળવાઈ રહેતાં રૂપિયો વધુ દબાણ હેઠળ આવે તેવી શક્યતા મિરે એસેટ્ શૅરખાનના વિશ્લેષક અનુજ ચૌધરીએ વ્યક્ત કરી હતી.
દરમિયાન આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 592.67 પૉઈન્ટનો અને 176.05 પૉઈન્ટનો ઘટાડો આવ્યો હતો, જ્યારે વિશ્વ બજારમાં ડૉલર ઈન્ડેક્સ વધ્યા મથાળેથી સાધારણ 0.09 ટકા ઘટીને 99.12 આસપાસ તથા બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.65 ટકા ઘટીને બેરલદીઠ 64.65 ડૉલર આસપાસ ક્વૉટ થઈ રહ્યાના અહેવાલ હતા.
