(વાણિજ્ય પ્રતિનિધિ તરફથી)
મુંબઈઃ શિકાગો ખાતે ગઈકાલે સોયાતેલના વાયદામાં 44 સેન્ટનો સુધારો આવ્યો હોવાના ઓવરનાઈટ અહેવાલ હતા. તેમ જ આજે મલયેશિયાના બુર્સા મલયેશિયા ડેરિવેટીવ્સ એક્સચેન્જ ખાતે ક્રૂડ પામતેલના વાયદામાં પણ 49 રિંગિટનો સુધારો આવ્યો હતો. આમ વૈશ્વિક પ્રોત્સાહક અહેવાલ છતાં આજે સ્થાનિક જથ્થાબંધ ખાદ્યતેલ બજારમાં હાજર, ડાયરેક્ટ ડિલિવરી અને સેલરિસેલ ધોરણે કામકાજો પાંખાં રહ્યા હોવાથી એકમાત્ર કપાસિયા રિફાઈન્ડમાં મથકો પાછળ જોવા મળેલા 10 કિલોદીઠ રૂ. 20ના સુધારાને બાદ કરતાં અન્ય તમામ દેશી-આયાતી તેલમાં ટકેલું વલણ રહ્યું હતું.
પ્રાપ્ત અહેવાલ અનુસાર આજે સ્થાનિકમાં ડાયરેક્ટ ડિલિવરી શરતે 10 કિલોદીઠ ગોદરેજ એગ્રોવેટના આરબીડી પામોલિનના રૂ. 1265, ઈમામીના આરબીડી પામોલિનના રૂ. 1280 અને સોયા રિફાઈન્ડના રૂ. 1265, પતંજલિ ફૂડ્સના આરબીડી પામોલિનના રૂ. 1300, રિલાયન્સ ક્નઝ્યુમરના સોયા રિફાઈન્ડના રૂ. 1310 અને સન રિફાઈન્ડના રૂ. 1470 તથા જી-વનના આરબીડી પામોલિનના રૂ. 1281 અને સોયા રિફાઈન્ડના રૂ. 1265 ક્વૉટ થઈ રહ્યા હતા, પરંતુ વેપાર નિરસ હતા.
આજે ગુજરાતમાં ગોંડલ મથકે મગફળીની 45,000 ગૂણીની આવક સામે મંડીમાં વેપાર મણદીઠ રૂ. 900થી 1225માં થયા હતા, જ્યારે રાજકોટ મથકે 19,000 ગૂણીની આવક સામે મંડીમાં વેપાર મણદીઠ અનુક્રમે રૂ. 900થી 1235માં થયા હતા. આજે મધ્ય પ્રદેશનાં સોયાસીડનાં મથકો પર 2.20 લાખ ગૂણીની આવક સામે મંડીમાં વેપાર ક્વિન્ટલે રૂ. 3300થી 4450માં અને પ્લાન્ટ ડિલિવરી શરતે રૂ. 4350થી 4450માં થયાના અહેવાલ હતા.
આજે હાજરમાં વિવિધ દેશી-આયાતી તેલના 10 કિલોદીઠ ભાવમાં આરબીડી પામોલિનના રૂ. 1290, સોયા રિફાઈન્ડના રૂ. 1290, સન રિફાઈન્ડના રૂ. 1460, સિંગતેલના રૂ. 1380, કપાસિયા રિફાઈન્ડના રૂ. 1335 અને સરસવના રૂ. 1515ના મથાળે રહ્યાના અહેવાલ હતા, જ્યારે ગુજરાતના મથકો પર આજે સિંગતેલમાં તેલિયા ટીનના વેપાર 15 કિલોદીઠ રૂ. 2170માં અને લૂઝમાં 10 કિલોદીઠ રૂ. 1360માં થયા હોવાનું સૂત્રોએ જણાવ્યું હતું.
આપણ વાંચો : મથકો પાછળ સિંગતેલમાં રૂ. 20નો ઉછાળો, આયાતી તેલમાં ચમકારો
