(વાણિજ્ય પ્રતિનિધિ તરફથી)
મુંબઈઃ કોપરમાં વૈશ્વિક સ્તરે પુરવઠાખેંચની સ્થિતિ વચ્ચે હાલમાં લંડન મેટલ એક્સચેન્જ ખાતે કોપર સહિતની ધાતુઓનાં ભાવમાં મક્કમથી સુધારાતરફી વલણ રહેતું હોવાના અહેવાલો સાથે સ્થાનિક જથ્થાબંધ ધાતુ બજારમાં પણ આજે કોપર, બ્રાસ અને એલ્યુમિનિયમની અમુક વેરાઈટીઓ, ઝિન્ક સ્લેબ અને ટીનમાં સ્ટોકિસ્ટોની લેવાલી ઉપરાંત સાર્વત્રિક સ્તરેથી માગને ટેકે ભાવમાં કિલોદીઠ રૂ. એકથી 16નો સુધારો આવ્યો હતો.
જોકે, આજે માત્ર નિકલમાં વધ્યા મથાળેથી સ્ટોકિસ્ટોની નફારૂપી વેચવાલીનું દબાણ રહેતાં ભાવ કિલોદીઠ રૂ. આઠ ઘટી આવ્યા હતા, જ્યારે નિરસ માગે કોપર આર્મિચર અને કોપર સ્ક્રેપ હેવીમાં કિલોદીઠ અનુક્રમે રૂ. ત્રણ અને રૂ. એકનો ઘટાડો આવ્યો હતો. તેમ જ અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સ્ટોકિસ્ટોની આક્રમક લેવાલી ઉપરાંત સાર્વત્રિક સ્તરેથી માગને ટેકે કોપર વાયરબારના ભાવ કિલોદીઠ રૂ. 16 વધીને રૂ. 1031 અને ટીન તથા કોપર કેબલ સ્ક્રેપના ભાવ કિલોદીઠ રૂ. આઠ વધીને અનુક્રમે રૂ. 3268 તથા રૂ. 947ના મથાળે રહ્યા હતા.
આ સિવાય અન્ય ધાતુઓ જેમાં છૂટીછવાઈ સ્ટોકિસ્ટોની લેવાલી અને ઔદ્યોગિક વપરાશકારો તથા સ્થાનિક ડીલરોની લેવાલીને ટેકે સુધારાતરફી વલણ જોવા મળ્યું હતું તેમાં કોપર યુટેન્સિલ્સ સ્ક્રેપ અને બ્રાસ શીટ કટિંગ્સના ભાવ કિલોદીઠ રૂ. પાંચ વધીને અનુક્રમે રૂ. 845 અને રૂ. 645, ઝિન્ક સ્લેબના ભાવ કિલોદીઠ રૂ. બે વધીને રૂ. 297 અને એલ્યુમિનિયમ ઈન્ગોટ્સના ભાવ કિલોદીઠ રૂ. એક વધીને રૂ. 268ના મથાળે રહ્યા હતા.
જોકે, ગઈકાલે નિકલના ભાવમાં કિલોદીઠ રૂ. 18નો ઉછાળો આવ્યા બાદ આજે વધ્યા મથાળેથી નફારૂપી વેચવાલીનું દબાણ રહેતાં ભાવ કિલોદીઠ રૂ. આઠ ઘટીને રૂ. 1360 અને નિરસ માગે કોપર આર્મિચર તથા કોપર સ્ક્રેપ હેવીના ભાવ કિલોદીઠ અનુક્રમે રૂ. ત્રણ ઘટીને રૂ. 904 અને રૂ. એક ઘટીનેરૂ. 930ના મથાળે રહ્યા હતા. આ સિવાય આજે ખપપૂરતી માગને ટેકે બ્રાસ યુટેન્સિલ્સ સ્ક્રેપ, એલ્યુમિનિયમ યુટેન્સિલ્સ સ્ક્રેપ તથા લીડ ઈન્ગોટ્સના ભાવ અનુક્રમે કિલોદીઠ રૂ. 593, રૂ. 216 અને રૂ. 185ના મથાળે ટકેલા રહ્યાના અહેવાલ હતા.
