(વાણિજ્ય પ્રતિનિધિ તરફથી)
મુંબઈઃ લંડન મેટલ એક્સચેન્જ ખાતે આજે કોપર સહિતની વિવિધ ધાતુઓમાં મિશ્ર વલણ રહ્યું હોવાના અહેવાલ સાથે સ્થાનિક જથ્થાબંધ ધાતુ બજારમાં પણ એકંદરે મિશ્ર વલણ જોવા મળ્યું હતું. જોકે, આજે મુખ્યત્વે કોપર યુટેન્સિલ્સ સ્ક્રેપ અને નિકલમાં સ્ટોકિસ્ટોની આક્રમક લેવાલી રહેતાં ભાવમાં અનુક્રમે કિલોદીઠ રૂ. 35નો અને રૂ. 18નો ચમકારો આવ્યો હતો, આ સિવાય કોપરની અન્ય વેરાઈટીઓમાં પણ માગ જળવાઈ રહેતાં કિલોદીઠ રૂ. એકથી ચારનો સુધારો આવ્યો હતો.
આ સિવાય બ્રાસ શીટ કટિંગ્સ અને એલ્યુમિનિયમ ઈન્ગોટ્સમાં સ્ટોકિસ્ટોની લેવાલીએ રૂ. પાંચનો અને વપરાશકાર ઉદ્યોગની માગને ટેકે ઝિન્ક સ્લેબમાં કિલોદીઠ રૂ. એકનો સુધારો આવ્યો હતો. વધુમાં આજે ટીનમાં સ્ટોકિસ્ટોની વેચવાલી જળવાઈ રહેતાં ભાવ વધુ કિલોદીઠ રૂ. 25 ઘટી આવ્યા હતા અને બ્રાસ યુટેન્સિલ્સ સ્ક્રેપમાં નિરસ માગે ભાવ કિલોદીઠ રૂ. એક ઘટી આવ્યા હતા અને લીડ ઈન્ગોટ્સમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સ્થાનિકમાં વૈશ્વિક પ્રોત્સાહક અહેવાલે મુખ્યત્વે કોપર યુટેન્સિલ્સ સ્ક્રેપ તથા નિકલમાં સ્ટોકિસ્ટોની આક્રમક લેવાલી ઉપરાંત સાર્વત્રિક સ્તરેથી માગને ટેકે ભાવ અનુક્રમે કિલોદીઠ રૂ. 35 વધીને રૂ. 983 અને રૂ. 18 વધીને રૂ. 1528ના મથાળે રહ્યા હતા.
વધુમાં આજે અન્ય ધાતુઓ જેમાં સ્ટોકિસ્ટોની છૂટીછવાઈ લેવાલી અને વપરાશકાર ઉદ્યોગની માગને ટેકે સુધારાતરફી વલણ જોવા મળ્યું હતું તેમાં બ્રાસ શીટ કટિંગ્સ અને એલ્યુમિનિયમ ઈન્ગોટ્સના ભાવ કિલોદીઠ રૂ. પાંચ વધીને અનુક્રમે રૂ. 805 અને રૂ. 307, કોપર વાયરબારના ભાવ કિલોદીઠ રૂ. ચાર વધીને રૂ. 1214 અને કોપર કેબલ સ્ક્રેપ, કોપર સ્ક્રેપ હેવી, કોપર આર્મિચર તથા ઝિન્ક સ્લેબના ભાવ કિલોદીઠ રૂ. એક વધીને અનુક્રમે રૂ. 115, રૂ. 1146, રૂ. 1134 અને રૂ. 311ના મથાળે રહ્યા હતા.
જોકે, આજે ટીનમાં સ્ટોકિસ્ટોની વેચવાલીનું દબાણ જળવાઈ રહેતાં ભાવ વધુ કિલોદીઠ રૂ. 25 ઘટીને રૂ. 3833ના મથાળે અને નિરસ માગે બ્રાસ યુટેન્સિલ્સ સ્ક્રેપના ભાવ કિલોદીઠ રૂ. એક ઘટીને રૂ. 672ના મથાળે અને ખપપૂરતી માગને ટેકે એલ્યુમિનિયમ યુટેન્સિલ્સ સ્ક્રેપ તથા લીડ ઈન્ગોટ્સના ભાવ અનુક્રમે કિલોદીઠ રૂ. 225 અને રૂ. 187ના મથાળે ટકેલા હતા.
