(વાણિજ્ય પ્રતિનિધિ તરફથી)
મુંબઈઃ મલયેશિયાના બુર્સા મલયેશિયા ડેરિવેટીવ્સ એક્સચેન્જ ખાતે આજે ક્રૂડ પામતેલના વાયદામાં 60 રિંગિટનો ઘટાડો આવ્યો હોવાના નિરુત્સાહી અહેવાલ છતાં આજે સ્થાનિક જથ્થાબંધ ખાદ્યતેલ બજારમાં હાજર, ડાયરેક્ટ ડિલિવરી તેમ જ સેલરિસેલ ધોરણે કામકાજો અત્યંત પાંખાં રહ્યા હોવાથી ખાસ કરીને આયાતી તેલના ભાવમાં ટકેલું વલણ રહ્યું હતું, જ્યારે આજે દેશી તેલમાં મથકો પાછળ સિંગતેલના ભાવ 10 કિલોદીઠ રૂ. 10 વધી આવ્યા હતા. આ સિવાય સરસવ અને કપાસિયા રિફાઈન્ડમાં અનુક્રમે રૂ. 20 અને રૂ. 10 ઘટી આવ્યા હતા.
બજારનાં સાધનોના જણાવ્યાનુસાર આજે ડાયરેક્ટ ડિલિવરી શરતે 10 કિલોદીઠ એડબ્લ્યુએલના આરબીડી પામોલિનના રૂ. 1240, સોયા રિફાઈન્ડના રૂ. 1260 અને સન રિફાઈન્ડના રૂ. 1525, પતંજલિ ફૂડ્સના આરબીડી પામોલિનના રૂ. 1253 અને સોયા રિફાઈન્ડના રૂ. 1260, ગોકુલ એગ્રોના આરબીડી પામોલિનના રૂ. 1240 અને સોયા રિફાઈન્ડના રૂ. 1265 અને ઈમામીના આરબીડી પામોલિન તથા સોયા રિફાઈન્ડના અનુક્રમે રૂ. 1240 અને રૂ. 1260 ક્વૉટ થઈ રહ્યા હતા, પરંતુ વેપાર નહોતા.
આજે ગુજરાતમાં ગોંડલ મથકે મગફળીની 20,000 ગૂણીની આવક ઉપરાંત ગઈકાલની શેષ 25,000 ગૂણી મળી કુલ 45,000 ગૂણીના અને રાજકોટ મથકે ગઈકાલની શેષ 60,000 ગૂણીના વેપાર મણદીઠ રૂ. 1200થી 1400માં થયા હતા. વધુમાં આજે મધ્ય પ્રદેશના મથકો પર 1.10 લાખ ગૂણી સોયાસીડની આવક સામે મંડીમાં વેપાર ક્વિન્ટલે રૂ. 4700થી 5000માં અને પ્લાન્ટ ડિલિવરી શરતે રૂ. 4900થી 5000માં થયા હતા.
આજે હાજરમાં વિવિધ દેશી-આયાતી તેલના 10 કિલોદીઠ ભાવમાં આરબીડી પામોલિનના રૂ. 1250, સોયા રિફાઈન્ડના રૂ. 1285, સન રિફાઈન્ડના રૂ. 1490, સિંગતેલના રૂ. 1610, કપાસિયા રિફાઈન્ડના રૂ. 1260 અને સરસવના રૂ. 1490ના મથાળે ટકેલા રહ્યા હતા, જ્યારે આજે ગુજરાતના મથકો પર સિંગતેલમાં તેલિયા ટીનના વેપાર 15 કિલોદીઠ રૂ. 20 વધીને રૂ. 2525માં અને લૂઝમાં 10 કિલોદીઠ રૂ. પાંચ વધીને રૂ. 1580માં થયાના અહેવાલ હતા.
